Футболдан ел біріншілігінде «Астана» ойсырай жеңілді

Аталған турдағы басты ойын «Ақтөбе» мен елордалық «Астана» арасында өтті.

Кездесу барысында ақтөбелік футболшылар жинақы қимыл көрсетті. Нәтижесінде 18-минутта Видемонт Уго есеп ашса, Шина 33-минутта басымдықты арттыра түсті.

Оған елордалық клубтан Аслан Дарабаев 43-минутта бір голмен жауап қайырды. Ойынның 73-минутында ақтөбелік клубтан Әлібек Қасым пенальтиді мүлтіксіз орындаса. Максим Самородов 95-минутта қорытынды есепті белгіледі.

Осылайша «Астана» қарсыласына 1:4 есебімен есе жіберді.

Қатарынан үш рет жеңіске жеткен «Ақтөбе» турнир кестесінде үшінші орынға көтерілді. Ал «Астана» жеңілгеніне қарамастан бірінші орынды сақтап қалды.

Сондай-ақ аталған турда өз алаңында Петропавлдың «Қызылжары» қостанайлық «Тобылдан» 1:3, ақтаулық «Каспий» Түркістанның «Тұранына» 0:2 есебімен жол берді.

Ал «Тараз» бен алматылық «Қайрат», Түркістан обысының «Мақтаралы» мен «Атырау» 1:1 есебіне қанағат білдірді.

Аталған турда 25 маусымда өз алаңында «Ақжайық» «Ордабасыдан» 0:1 есебімен жеңілсе, «Ақсу» мен «Шахтер» 1:1 есебімен тең түсті.