مەديتسينا كادرلارىن ىنتالاندىرۋ ءۇشىن ۇكىمەت قانداي شارالار قابىلداۋدا

بۇل تۋرالى ءماجىلىس دەپۋتاتتارىنىڭ ساۋالىنا ق ر پرەمەر-ءمينيسترىنىڭ ورىنباسارى ەرالى توعجانوۆتىڭ جاۋابىنا ايتىلعان، دەپ حابارلايدى قازاقپارات ءتىلشىسى.

«ۇكىمەت مەديتسينا كادرلارىن ىنتالاندىرۋ ماقساتىندا ءبىرقاتار جۇيەلى ءىس-شارالار قابىلداۋدا. مەملەكەت باسشىسىنىڭ تاپسىرمالارىن ىسكە اسىرۋ اياسىندا 2023-جىلعا قاراي دارىگەرلەردىڭ جالاقىسىن كەزەڭ-كەزەڭىمەن كوتەرۋ، ونىڭ ەكونوميكاداعى ورتاشا جالاقىعا اراقاتىناسىن 2,5 ەسەگە دەيىن جەتكىزۋ، مەديتسينا قىزمەتكەرلەرىنىڭ مارتەبەسىن ارتتىرۋ، اۋىلدىق ەلدى مەكەندەرگە كەلگەن جاس مامانداردى الەۋمەتتىك قولداۋ بويىنشا ءىس-شارالار قابىلدانۋدا»، - دەپ اتاپ وتەدى ۆيتسە-پرەمەر جاۋابىندا.

ونىڭ اتاپ وتۋىنشە، جەرگىلىكتى اتقارۋشى ورگاندار مەديتسينا قىزمەتكەرلەرىن الەۋمەتتىك قولداۋ اياسىندا جاتاقحانالار ۇسىنۋ، كوممۋنالدىق شىعىستار، بايلانىس قىزمەتتەرى، جالداۋ تولەمدەرى بويىنشا وتەماقى تولەمدەرى ۇيىمداستىرۋ، بالاباقشالاردا ورىندار ءبولۋ، جۇبايى/زايىبىن جۇمىسقا ورنالاستىرۋ جانە باسقا ءىس-شارالاردى قابىلداپ جاتىر.

«ماسەلەن، مەديتسينالىق كادر تاپشىلىعىن تومەندەتۋ بويىنشا جۇمىس قوستاناي، سولتۇستىك قازاقستان جانە اقمولا وبلىستارىندا، سونداي-اق نۇر-سۇلتان قالاسىندا وڭ ناتيجە بەرۋدە. وندا جاس مامانداردى الەۋمەتتىك قولداۋ ءىس-شارالارى ولاردىڭ ورنىعۋ كورسەتكىشىنىڭ ارتۋىنا ىقپال ەتۋدە. سونداي- اق شىعىس قازاقستان جانە قىزىلوردا وبلىستارىندا بيزنەستىڭ قولداۋىمەن تۇراقتى نەگىزدە مەديتسينا قىزمەتكەرلەرىن وقىتۋ، ونىڭ ىشىندە شەتەلدەردە ءبىلىم الۋعا جولداما بەرۋ تاجىريبەسى ەنگىزىلۋدە. جىل سايىن وڭىرلەردىڭ جەرگىلىكتى بيۋدجەتىنەن جانە مەديتسينالىق ۇيىمداردىڭ قاراجاتىنان ستيپەنديا تولەي وتىرىپ، رەزيدەنتۋرادا مەديتسينا ماماندارىن دايارلاۋعا قارجىلاندىرۋ بولىنەدى»، - دەدى ەرالى توعجانوۆ.