كىشى تالدىكول ساقتالىپ قالادى - ەكولوگيا مينيسترلىگى

None
None
نۇر-سۇلتان. قازاقپارات - ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ ەلورداداعى كىشى تالدىكول تۋرالى سۇراقتارعا جاۋاپ بەردى، دەپ حابارلايدى قازاقپارات ءتىلشىسى.

«ءبىز زەرتتەۋ جۇمىستارىن جۇرگىزدىك. قازىرگى ۋاقىتتا بۇل كولدى تولىقتىراتىن قاينار كوزدەرى جوق ەكەنىن تۇسىنەمىز. سوندىقتان دا تابيعي تۇردە قۇرعاپ جاتىر. بولاشاقتا بۇل كولدى قوسىمشا تولىقتىرىپ وتىرماسا، تۇتاستاي قۇرعاۋ قاۋپى بار. ءبىز قالا اكىمدىگىمەن بىرنەشە رەت كەزدەسىپ، تىكەلەي تالدىكولدىڭ قاسىندا كوشپەلى كەڭەستەر وتكىزدىك. تولىقتىرىپ وتىرماسا بۇل كول جاقىن ارادا قۇرعاپ كەتەتىنىن تۇسىنەمىز. بۇعان بىرنەشە فاكتورلار، سونىڭ ىشىندە بەلسەندى قالا قۇرىلىسى دا ىقپال ەتەدى»، - دەپ جاۋاپ بەردى مينيستر ورتالىق كوممۋنيكاتسيالار قىزمەتىندە.

دەگەنمەن، مينيستر اتاپ وتكەندەي، كىشى تالدىكول سۋ نىسانى رەتىندە ساقتالىپ قالادى.

«بۇل كولدىڭ اۋدانى 20 گەكتاردان كەم بولمايدى. اكىمدىك تاعى قوسىمشا زەرتتەۋلەر جۇرگىزەدى. بۇل كولدىڭ ەڭ ۇلكەن جانە تەرەڭ بولىگى ساقتالىپ قالادى. قالعان بولىگىندە - كولدىڭ اينالاسىندا رەكرەاتسيالىق ايماق ۇيىمداستىرىلادى»، - دەپ تولىقتىردى سپيكەر.

مينيستر اكىمدىك ەسەبىنەن كولدىڭ ناقتى شەكارالارى انىقتالاتىنىن اتاپ ءوتتى.

«كولدىڭ ءتۇبىن تۇنبا بالشىقتاردان تازارتۋ جۇمىستار جۇرگىزىلەدى جانە قولدان سۋ تولتىرىلادى. سوندىقتان، جاقىن ارادا تالدىكول مەن ونىڭ اينالاسىنداعى رەكرەاتسيالىق ايماقتار ۇيىمداستىرىلاتىن بولىگى قالا تۇرعىندارى ءۇشىن وتە جاقسى دەمالىس ورنى بولادى دەپ ويلايمىن»، - دەدى سەرىكقالي برەكەشيەۆ.

سوڭعى جاڭالىقتار