قازاق تىلىنە اۋدارىلعان بەس تانىمال كىتاپ

None
None
نۇر-سۇلتان. قازاقپارات - كىتاپ - ءبىزدىڭ رۋحاني بايلىعىمىز، ءبىلىم تەڭىزىندەگى ءوز كومپاسىمىز. ويتكەنى عالامنىڭ بار قۇپياسى كىتاپتا ساقتاۋلى.

الەمدىك كلاسسيكتەردىڭ قانداي كىتاپتارىن قازاق تىلىندە وقۋعا بولاتىنىن وقىڭىز.

ۆيكتور گيۋگو

«الاستالعاندار»

فرانسۋزدىڭ ۇلى جازۋشىسى ۆيكتور گيۋگونىڭ كەڭ اۋقىمدى ەپيكالىق «الاستالعاندار» رومانى باسقا دا شىعارمالارىنداعى سەكىلدى باستى كەيىپكەرلەر قاقتىعىسى قايىرىمدىلىق پەن زۇلىمدىق ايقاسىنىڭ رومانتيكالىق يدەياسىمەن ۇلاسادى، الەۋمەتتىك پروبلەمالار ەتيكالىق رەتپەن ۇندەسەدى.

جان دۇنيەسىندە قۇدايدى قۇرمەت تۇتۋدان وزگە قىلاۋداي ءمىنى جوق ەپيسكوپ ميريەل، الەۋمەتتىك ومىردە تەك زاڭ مەن قۇقىقتى بارىنەن جوعارى قوياتىن ينسپەكتور جاۆەردىڭ ۇستانعان قاعيداتتارى مەن ءىس-ارەكەتتەرى باستى كەيىپكەر جان ۆالجاننىڭ تاعدىرى ارقىلى سىنالادى.

اقىرىندا ەپيسكوپتىڭ مەيىرىمدىلىك زاڭى جاۆەردىڭ قاتاڭ قۇقىقتىق ۇستانىمىنان باسىم تۇسەدى.

اتاقتى رومانىندا گيۋگو تىرشىلىكتىڭ ءمانى ماتەريالدىق ءومىر ەمەس، يماندىلىق ەكەنىن العا تارتادى. كەزىندە ورىس ادەبيەتىنىڭ الىبى لەۆ تولستوي فرانسۋزدىڭ تاڭداۋلى رومانى دەپ باعالاعان بۇل شىعارما قاي زاماندا دا ءوز قۇنىن جويماق ەمەس.

... وسى ءتۇنى فانتينا ون جاسقا قارتايىپ كەتىپتى.

— يسۋسە! — دەدى مارگاريتا. — ساعان نە بولعان، فانتينا؟

— ەشتەڭە، — دەپ جاۋاپ قاتتى فانتينا. — كەرىسىنشە، ءبارى دە جاقسى. قىزىم دا الگى سۇمدىق اۋرۋدان ولمەيدى، ونىڭ ءدارىسى بولادى. ءوزىم ريزامىن.

وسى سوزدەن كەيىن ول كارى قىزعا ۇستەلدە جىرتىلىپ جاتقان ەكى ناپولەوندوردى كورسەتتى.

— و قۇدايىم يسۋسە! — دەپ تاعى داۋىستاپ جىبەردى مارگاريتا. — مۇنىڭ تۇتاس بايلىق قوي! بۇل التىندى قايدان الدىڭ؟

— تاپتىم! — دەپ جاۋاپ بەرگەن فانتينا جىميىپ كۇلگەن. شىراق جارىعى بەتىنە ءتۇستى. مۇنىسى قان ارالاس جىميىس بولاتىن. ەرنىنىڭ بۇرىشىنان قىزعىلت سىلەكەيى كورىندى، ال اۋزى ۇڭىرەيىپ تۇر.

ەكى ماڭداي ءتىسىن جۇلىپ الىپتى...

الەكساندر گرين

«ال قىزىل جەلكەندەر»

اۆتور بۇل شىعارماسىندا ادامدىق باقىتتىڭ تەڭدەسسىز رومانتيكالىق الەمىن جاسادى. رومان — ماحاببات جايلى سىرلى دا نازىك پوەما. بۇل كىتاپتا القىزىل جەلكەندەر تۋرالى ەرتەگى شىندىققا اينالادى. سول ارقىلى ەگەر ادام ارمانداپ، باقىتىنا ۇمتىلىپ، سوعان جەتۋ جولىندا وزىنە سەنىمدى بولعاندا عانا ماقساتقا جەتەتىنە سەندىرەدى.

«تولقىن پەرىسى» - رومانتيزم وكىلى الەكساندر گريننىڭ باستى شىعارمالارىنىڭ ءبىرى. تولقىن بەتىمەن جۇرە الاتىن عاجايىپ قابىلەتكە يە ادەمى قىز فرەزي گرانت تۋرالى روماندى وقي وتىرىپ، ارمانشىل توماس گارۆەيمەن بىرگە «تولقىن پەرىسىمەن» جانە «سۇڭگۋىرمەن» ساياحات جاساڭىز.

... اسسولدىڭ ساۋساعىندا گرەيدىڭ شۇعىلالى ساقيناسى بوگدە بىرەۋدىڭ ساۋساعىندا تۇرعانداي جالتىرايدى — سول زاماتتا ول ءوز ساۋساعىن ءوزى تانىماي قالعاندىقتان، مۇنى وزىمدىكى دەي المادى. «بۇل كىمنىڭ ءازىلى؟ ازىلدەگەن كىم؟ — دەدى ول جەدەلدەتىپ. — مەن ۇيىقتاپ تۇرمىن با وسى؟ بالكىم، تاۋىپ الىپ، ۇمىتىپ كەتكەن شىعارمىن؟ ...

جورجي امادۋ

«قۇم جاعالاۋدىڭ كاپيتاندارى»

قۇم جاعالاۋدىڭ كاپيتاندارى ءالى دە بار. ولار ەسەيىپ، ەر جەتەدى، ورنىنا باسقالارى كەلەدى، جىل وتكەن سايىن قاتارلارى كوبەيە تۇسۋدە. ءسابي كۇنىندە باسىبايلى ويىنشىعى بولماعان، مەكتەپكە بارماعان، وتباسى جىلۋى مەن انا مەيىرىمىن كورمەي وسكەن بۇل بالالاردىڭ ءومىرىن جاقسى جاعىنا وزگەرتۋگە بولادى. قۇم جاعالاۋ كاپيتاندارىنىڭ قارىندارى اش، ءبىراق ولار تاعدىرعا مويىنسۇنباعاندار.

... قۇم جاعالاۋ كاپيتاندارىنىڭ باسشىسى پەدرو پۋليانى دا سىزدەر وسى جەردەن تاباسىزدار. بۇل لاقاپ اتتى ول تىم كىشكەنتاي كەزىندە — بەس جاسىندا العان بولاتىن. ونىڭ اكەسى پوليتسيانىڭ وعىنان قازا تاپتى. ال شەشەسىنىڭ كىم ەكەنىن ول بىلمەيتىن. قازىر پەدرونىڭ جاسى ون بەستە. ون جىلدان بەرى ول بايا كوشەلەرىن كەزىپ ءجۇرىپ، ونى بەس ساۋساعىنداي ءبىلىپ العان. قازىر قالادا ول بىلمەيتىن بىردە-ءبىر كوشە، دۇكەن نەمەسە ءدامحانا جوق...

گۇنتەكين رەشات نۋري

«ۇزىلگەن جاپىراقتار»

جىل ارتىنان جىل ءوتىپ، سامايىن قىراۋ شالعان ءالي ىرزا قارتتىق جايلى كوپ ويلاناتىن بولدى. جوقشىلىق شاڭىراعىن شايقالتىپ، بالالارى اكەسىمەن ساناسپايتىندى شىعاردى. ەسكى كوزقاراستاعى اكە مەن جاڭا ءومىر سالتىنا اياق باسقان بالا اراسىنداعى تۇسىنبەۋشىلىك ۇلعايا ءتۇسىپ، ولاردىڭ ءۇزىلىپ تۇسكەن كۇزگى جاپىراقتاي تۋعان شاڭىراقتان الىستاۋى اكە جۇرەگىنە قاياۋ سالعان ەدى.

... - ءالي ىرزا، رەنجىسەڭ دە، رەنجىمەسەڭ دە سول... كوڭىلىمدە نە بولسا، ءبارىن ايتامىن. سەن قىرسىقتىعىڭمەن ءاردايىم بالالارىڭا كەسىرىڭدى تيگىزىپ كەلەسىڭ. ولار ون بەس، جيىرما جاسقا كەلگەندە اكەلىك مىندەتىم بىتەدى دەپ ويلايسىڭ با؟ مۇلدە ولاي ەمەس. نەگىزگى مىندەتىڭ سول كەزدە باستالادى. ولار بۇرىن كىپ-كىشكەنتاي بالالار ەدى، قولدارىنا قىرىق تيىندىق ءبىر ىسقىرعىش، ءبىر قۋىرشاق بەرسەڭ، بۇكىل الەمدى قولدارىنا ۇستاتقانداي قۋاناتىن. بۇل بالالاردىڭ ءبارى ەندى ۇلكەن ازامات بولدى. ءبارىن دە جاقسى تۇسىنەدى.. . ءارقايسىسىنىڭ ءبىر-ءبىر ارمانى بار، ءبىراق قانداي̆ ەكەنىن بىلمەيمىن. مەنىڭشە، ءبىز ولاردىڭ تاربيەسىندە ءبىر قاتەلىك جىبەرىپ الدىق...

ورحان پامۋك

«جاڭا ءومىر»

جاڭا وقىعان ءبىر كىتاپتىڭ اسەرىنەن ءوزىن-ءوزى ۇمىتىپ، مۇلدە بەيتانىس دۇنيەگە كۇمپ بەرگەن ستامبۇلدىق كىتاپقۇمار ستۋدەنت جايلى رومان. جاس جىگىت سول الەمدى تابۋ ءۇشىن سەرگەلدەڭگە ءتۇسىپ، تالاي قيىندىقتى باسىنان وتكەرەدى.

قازاقتىڭ دۇنيەتانىمىنا جات بولعاندىقتان، مۇلدە بەيتانىس بولعاندىقتان، وقىرمان بۇل كىتاپتى توسىرقاۋى دا مۇمكىن. الايدا تۋىندىنىڭ تارتىمدىلىعى دا وسىندا دەپ ويلايمىز. شىعارماداعى قىزىقتى قيالىنداعى ارمانىنا بالاپ جۇرگەنىنە سوڭعى ساتتە عانا كوزى جەتەتىن پەندەۋي عۇمىردىڭ نەگىزى وزەك بولعانىنا، ادامداردىڭ كوپشىلىگى قۇمىرسقا تىرلىكپەن ءومىر ءسۇرىپ جاتقانىنا شىعارمانى وقي وتىرىپ تاعى ءبىر كوز جەتكىزەسىز.

... سول ساتتە مەنى «ىلعي وسىلاي تەز-تەز جۇرسەم، ەشقاشان توقتاماسام، ساپارعا شىقسام، كىتاپتاعى الەمگە جەتەتىن شىعارمىن» دەگەن وي بيلەپ الدى. ەرەكشە نۇرىن جان-جۇرەگىممەن سەزگەن جاڭا ءومىرىم الىستاعى ءبىر ەلدە، بالكىم، ءالى اشىلماعان ءبىر جەردە شىعار. دەگەنمەن ارەكەتتەنگەن سايىن سوعان جاقىنداي تۇسەرىمدى، تىم بولماعاندا بۇرىنعى ءومىرىمدى ارتىمدا قالدىرارىمدى سەزىپ ەدىم...

the-village-kz.com

سوڭعى جاڭالىقتار