انتيۆاكسەرلەرمەن جەكە كەزدەسۋگە دايىنمىن - الەكسەي سوي

None
None
نۇر-سۇلتان. قازاقپارات - دەنساۋلىق ساقتاۋ ءمينيسترى الەكسەي سوي ۆاكسينا سالۋعا قارسى تۇرعىندار مەن سانيتارلىق-ەپيدەميولوگيالىق باقىلاۋ كوميتەتىنىڭ رەسمي وكىلى ەرجان بايتانايەۆتىڭ اراسىنداعى كەلەڭسىز وقيعا تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

ورتالىق كوممۋنيكاتسيالار قىزمەتىندە ب ا ق وكىلدەرى دەنساۋلىق ساقتاۋ ءمينيسترى الەكسەي سويعا انتيۆاكسەرلەر مەن مينيسترلىك ماماندارىنىڭ اراسىنداعى كەلەڭسىز وقيعا تۋرالى ساۋال قويدى.

الەۋمەتتىك جەلىدە بىرنەشە تۇرعىننىڭ سانيتارلىق-ەپيدەميولوگيالىق باقىلاۋ كوميتەتىنىڭ رەمي وكىلى ەرجان بايتانايەۆقا قول كوتەرگەنى تۋرالى ۆيدەو تاراعان بولاتىن.

«انتيۆاكسەرلەرمەن كەزدەسۋگە ورىنباسارلارىڭىز بەن رەسمي وكىلدەردى جىبەرگەنشە نەگە ءوزىڭىز شىقپادىڭىز. ولار ءسىزدىڭ اتىڭىزدى اتاپ شاقىردى عوي. ەگەر ءسىز شىققاندا مۇنداي كەلەڭسىزدىك بولماس پا ەدى؟» - دەپ سۇرادى جۋرناليست.

«ءتۇسىندىرۋ جۇمىستارى بارلىق ساتىدا ءجۇرىپ جاتىر. ۆيتسە-مينيسترلەر دە، مەن دە حالىقپەن بايلانىسقا شىعىپ ءجۇرمىز. سوندىقتان، كىم بوس بولسا سول كەزدەسەدى. بۇل جەردە ەشقانداي سۇراق بولماۋى كەرەك. بىزدە بارلىق ماماندار حالىقتىڭ الدىنا شىعىپ ءجۇر. كىم سول ماڭايدا بولسا، سول شىعادى. بوس بولعان ماماندار شىقتى. دەپارتامەنت ديرەكتورلارىنان كەيىن ول توپقا ۆيتسە-مينيستر دە شىقتى. سول كەزدەسۋگە قاتىسقان مامانداردىڭ ءبىلىم-بىلىگى ول كىسىلەردىڭ سۇراقتارىنا جاۋاپ بەرۋگە جەتەدى دەپ ويلايمىن. نەگىزىنەن قويىلعان سۇراقتىڭ كوبىنە ويداعىداي جاۋاپ العانىن وزدەرى دە ايتقان»، - دەدى مينيستر.

مينيستر مۇمكىندىك بولسا، انتيۆاكسەرلەرمەن جەكە كەزدەسۋگە دايىن ەكەنىن جەتكىزدى.

«ءبىز ازاماتتاردىڭ بارىنە بىردەي قارايمىز. ءبىز ءۇشىن ءاربىر قازاقستان ازاماتىنىڭ ورنى بىردەي. مۇمكىندىك بولسا، ءارقاشان كەزدەسەمىز. ءارقاشان كەزدەسۋگە دايىنبىز. ناقتى مەن جەكە كەزدەسۋگە دايىنمىن»، - دەدى الەكسەي سوي.

سوڭعى جاڭالىقتار