مەملەكەت باسشىسى ارداگەر جۋرناليستى عاسىر تويىمەن قۇتتىقتادى

مينيستر مەرەيتوي يەسىنە مەملەكەت باسشىسى قاسىم- جومارت توقايەۆتىڭ ارنايى العىس حاتىن تابىستادى. بۇل تۋرالى قازاقپارات اقپارات جانە قوعامدىق دامۋ مينيسترلىگىنە سىلتەمە جاساپ حابارلايدى.

«ءسىز عيبراتتى عۇمىر جولىڭىزدىڭ بۇگىنگى ءبىر عاسىرلىق بەلەسىنە ۇلكەنگە دە، جاسقا دا ۇلگى بولاتىن ادامي بيىك بولمىسىڭىزبەن جەتىپ وتىرسىز. وتاندىق باسپا ءسوز سالاسىندا كوپ جىل قاجىرلى قىزمەت ەتىپ، ەلىمىزدىڭ بۇقارالىق اقپارات قۇرالدارىن دامىتۋعا وراسان زور ەڭبەك ءسىڭىردىڭىز. ەل يگىلىگى ءۇشىن اتقارعان جەمىستى جۇمىسىڭىز ءۇشىن سىزگە العىسىمدى ءبىلدىرىپ، 100 جاسقا تولعان مەرەيتويىڭىزبەن شىن جۇرەكتەن قۇتتىقتايمىن. دەنىڭىزگە ساۋلىق، اۋلەتىڭىزگە اماندىق تىلەيمىن»، - دەلىنگەن العىس حاتتا.

سونىمەن قاتار مينيستر ءوز سوزىندە مەرەيتوي يەسىنە: «ءسىز بۇكىل سانالى عۇمىرىڭىزدى - قازاق جۋرناليستيكاسىنىڭ دامۋىنا ارنادىڭىز. سوندىقتان ءوزىڭىزدىڭ ءتول سالاڭىز - باسپا ءسوز زامانمەن بىرگە ءوسىپ- وركەندەپ، ءوز ورنىن جوعالتپاي كەلەدى. مۇنىڭ ءوزى ەڭ الدىمەن وزىڭىزدەي ارداگەر- جۋرناليستەر سالعان سارا جولدىڭ جەمىستى جالعاسى ەكەنى داۋسىز. سوندىقتان بۇگىنگى مەرەيتويىڭىز اۋلەتىڭىزدىڭ عانا ەمەس، ءبىزدىڭ ۇلتتىق جۋرناليستيكانىڭ ورتاق قۋانىشى»، - دەپ اتاپ ءوتتى.

ءوز كەزەگىندە حانىمبۇبى اقجولوۆا مەملەكەت باسشىسىنىڭ ىستىق ىقىلاستى قۇتتىقتاۋىنا ريزاشىلىعىن بىلدىرە وتىرىپ «ءبىر عاسىر بيىگىندە» اتتى جاڭا كىتاپتىڭ ءبىر داناسىن پرەزيدەنتكە جولدادى.

حانىمبۇبى اقجولوۆا الماتى وبلىسىندا دۇنيەگە كەلگەن. قازاقستانعا ەڭبەگى سىڭگەن مادەنيەت قايراتكەرى، ارداگەر جۋرناليست. 1944 -جىلى قازمۋ- ءدىڭ فيلولوگيا فاكۋلتەتىنىڭ جۋرناليستيكا بولىمىنە وقۋعا ءتۇسىپ، ادەبيەتتانۋشى، پروفەسسور ءمۇسىلىم بازاربايەۆ، اتاقتى عالىم، جازۋشى- جۋرناليست مۇقان ماماجانوۆ، جازۋشى كەمەل توقايەۆ سىندى بولاشاق تانىمال تۇلعالارمەن قاتار وقىپ، ءبىلىم العان.

1949 -جىلى ءبىلىم ورداسىن قىزىل ديپلوممەن ءتامامداپ، «سوتسياليستىك قازاقستان» («ەگەمەن قازاقستان») رەسپۋبليكالىق گازەتىندە ۇزاق جىلدار بويى قىزمەت اتقارعان. كەيىننەن تۋعان جەرىنە ورالىپ، جامبىل اۋداندىق «بولشيەۆيكتىك جول» («ەكپىندى ەڭبەك» ) گازەتىنە رەداكتور بولىپ تاعايىندالىپ، قاجىرلى ەڭبەك ەتەدى. 1971 -جىلى زەينەت جاسىنا جەتىپ، «قازاقستانعا ەڭبەگى سىڭگەن مادەنيەت قايراتكەرى» قۇرمەتتى اتاعىن يەلەنگەن. الماتى وبلىسىنىڭ قۇرمەتتى ازاماتى.