سايلاۋدا قاتاڭ بەيتاراپتىق تانىتامىز - تولەگەن كۇنادىلوۆ

25-شىلدەدە وتەتىن اكىم سايلاۋىنا «پارتيالىق ەمەس بايقاۋ ورتالىعى» رەسپۋبليكالىق قوعامدىق بىرلەستىگىنىڭ وكىلدەرى بەيتاراپ بايقاۋشى رەتىندە قاتىسپاقشى. ۇيىمنىڭ ءتوراعاسى تولەگەن كۇنادىلوۆ باق وكىلدەرىنە سايلاۋعا دايىندىق قالاي جۇرگەنى تۋرالى مالىمەت بەردى.

«وسى سايلاۋعا باقىلاۋشى ۇيىم رەتىندە قاتىسقانداعى باستى مىندەتىمىز - ازاماتتاردىڭ ەرىك بوستاندىعىنىڭ بۇزىلۋىنا جول بەرمەۋ. قازىرگى كەزدە ورتالىق پەن وڭىردەگى فيليالدارى باقىلاۋشىلار پۋلىن جاساقتاپ بولدى. وقىتۋ جۇمىستارى اياقتالدى. 30 دان استام ونلاين سەمينار وتكىزدىك. قوعامدىق بايقاۋدى بارىنشا ءتيىمدى پايدالانۋ ءۇشىن وقىتۋ ناۋقانىن ەڭ ۇزدىك حالىقارالىق ستاندارتتار شەڭبەرىندە ۇيىمداستىردىق. سايلاۋ ناۋقانىنىڭ كۇردەلى ەكەنىن ءبىز تۇسىنەمىز. بايقاۋ كەزىندە سايلاۋ زاڭناماسىنىڭ بۇكىل ەرەكشەلىكتەرىن جەتىك بىلەتىن جانە ءوزىن بايقاۋشى رەتىندە قۇقىقتارى مەن مىندەتتەرىن تولىقتاي جانە ناقتى تۇسىنەتىن ادامدارعا سۇيەنەمىز. بۇل سايلاۋعا ءادىل جانە وبەكتيۆتى باعا بەرۋگە مۇمكىندىك بەرەدى»، - دەدى «پارتيالىق ەمەس بايقاۋ ورتالىعى» رەسپۋبليكالىق قوعامدىق بىرلەستىگىنىڭ ءتوراعاسى.

ورتالىق ءوز بايقاۋشىلارىن وسى ناۋقانعا ارناپ دايىندالعان ەرەكشە بلوكنوتپەن جابدىقتاپ وتىر. «سايلاۋ ءۇردىسىنىڭ بارلىق ەرەكشەلىكتەرىن ەسكەرەتىن بايقاۋشىنىڭ بلوكنوتىن ازىرلەپ، بايقاۋشىلاردىڭ بارىنە تاپسىردى. سايلاۋ كۇنى زاڭبۇزۋشىلىق انىقتالسا، سول بلوكنوتقا تىركەپ وتىرادى. بايقاۋشىلاردىڭ بارىنە سايلاۋ ۋچاسكەلەرىنە كىرۋگە قاجەت قۇجاتتار بەرىلدى. دايىندىق 100 پايىز دەپ ايتۋعا بولادى. ءبىزدىڭ باسقا بايقاۋشىلاردان ەرەكشەلىگىمىز - قاتاڭ بەيتاراپتىق تانىتامىز. ەشقانداي پارتيا وكىلدەرىنە بولسىن، مەملەكەت بيلىگىنە بولسىن، قانداي دا ءبىر سايلاۋ ۋچاسكەسىنىڭ كوميسسيا مۇشەلەرىنە بولسىن، بارىنە قاتاڭ تۇردە بەيتاراپ ۇستانىمدا بولامىز. زاڭنامالىق تۇرعىدا سايلاۋ ۇدەرىسىن كەدەرگى جاساماي، بايقاۋ جۇرگىزەمىز»، - دەيدى تولەگەن كۇنادىلوۆ.

ونىڭ ايتۋىنشا پارتيالىق ەمەس باۋقاشىلاردىڭ جۇمىسىنا 95 ۇكىمەتتىك ەمەس ۇيىم سەرىكتەس رەتىندە اتسالىسادى.

«سايلاۋ وتەتىن ۋچاسكەلەردىڭ بارىندە ءبىزدىڭ بايقاۋشىلار بولادى. زاڭناما بويىنشا ءار ۋچاسكەدە بەلگىلى ءبىر ۇيىمنان ءبىر بايقاۋشى بولۋى كەرەك. ءبىز دايىنداعان بوكنوتتىڭ ەرەكشەلىگى - وندا سايلاۋ ۇردىسىنە قاتىستى زاڭنامالىق نورمالاردىڭ سىلتەمەلەرى تولىق ەنگىزىلگەن. سايلاۋ كەزىندە زاڭ بۇزىلسا، بلوكنوتتان زاڭنىڭ سىلتەمەسىن قاراپ، بلوكنوتتا بەرىلگەن اكتىنى تولتىرۋ ارقىلى تىركەپ وتىرادى. بۇل بايقاۋشىنىڭ سايلاۋ كەزىندە زاڭداردى اقتارىپ، اۋرەلەنبەۋى ءۇشىن جاسالىپ وتىر. سايلاۋ زاڭناماسى بويىنشا ءاربىر بايقاۋشى ءوزىنىڭ ەسكەرتۋلەرىن ناقتىلى فاكتىلەرمەن دالەلدەۋ ارقىلى جۇزەگە اسىرا الادى. بلوكنوت بايقاۋشىنىڭ وسى تۇرعىدا ءوز جۇمىسىن تولىققاندى ىسكە اسىرۋىنا كومەكتەسەدى. بۇل بوكنوتتىڭ ەلەكتروندى نۇسقاسى دا بار. ءبىراق سايلاۋ كەزىندە بايقاۋشىلار قاعاز نۇسقاسىن پايدالانادى»، - دەدى ورتالىق باسشىسى.

ۇيىم وكىلدەرى سايلاۋ وتكەننەن كەيىن ونىڭ قورىتىندىسىن ارنايى بايانداما نەمەسە ەسەپ تۇرىندە راسىمدەيتىندەرىن دە ايتتى.

«سايلاۋ وتكەننەن كەيىن دۇيسەنبى كۇنى قورىتىندىلاپ، ەگەر زاڭبۇزۋشىلىقتار تىركەلسە، سولاردىڭ ساپاسىنا، ماڭىزدىلىعىنا قاراپ قۇزىرلى ورگاندارعا جىبەرەمىز. كەرەك بولسا، حالىقارلىق ۇيىمدارعا جىبەرۋگە دە دايىنبىز»، - دەدى تولەگەن كۇنادىلوۆ.