جەر رەفورماسى: جايىلىم جەتىسپەۋشىلىگى ماسەلەسىن قالاي شەشۋگە بولادى

«قازىر اۋىلدىق ەلدى مەكەندەردىڭ ەڭ وزەكتى ماسەلەسىنىڭ ءبىرى - ولاردىڭ اينالاسىنداعى جايىلىم تاپشىلىعىنا بايلانىستى. ستاتيستيكالىق مالىمەتكە سايكەس، اۋىلدىق ەلدى مەكەندەردە مال شارۋاشىلىعى ءونىمىنىڭ 66 پايىزى وندىرىلەدى. مال باسىنىڭ 60 پايىزى وسىندا. وزدەرىڭىزگە بەلگىلى، اۋىلداعى اعايىننىڭ كۇنكورىسى دە وسى مالعا بايلانىستى. وكىنىشكە قاراي، بۇل وراسان بيولوگيالىق اكتيۆ مەملەكەتتىك قولداۋدان تىس قالىپ، ەشقانداي تەحنولوگيالىق پروتسەستەرگە تارتىلماي وتىر. مامانداردىڭ ەسەبى بويىنشا، ەگەر ءبىز تەك قانا مال ازىعىنىڭ ساپاسىن كوتەرسەك، ەلدى مەكەندەردە وندىرىلەتىن ەت پەن ءسۇتتىڭ ونىمدىلىگى كەم دەگەندە 30 پايىزعا ۇلعايادى. جۇمىس توبىنىڭ ماماندارى بۇل ماسەلەگە بايلانىستى كوپتەگەن ۇسىنىستار ەنگىزدى. ەڭ نەگىزگىسى - اۋىل شارۋاشىلىعىندا پايدالانباي جاتقان جەرلەردى ەلدى مەكەندەرگە قايتارۋ»، - دەدى ا. كۇرىشبايەۆ اۋىل شارۋاشىلىعى مينيسترلىگىندە وتكەن جەر رەفورماسى جونىندەگى كوميسسيا وتىرىسىندا.

ق ر ا ش م مالىمەتى بويىنشا، اۋىلدىق مەكەندەردىڭ مالىنا 29 ميلليون گەكتار جايىلىم جەتىسپەيدى. ال ۇيىمداستىرىلعان شارۋاشىلىقتاردا 33 ميلليون گەكتار جايىلىم يگەرىلمەي جاتىر.

«وعان قوسا، كوميسسيانىڭ وتكەن وتىرىسىندا ورمان قورلارىندا ەرەكشە قورعالاتىن ايماقتار شەگىندە 10 ميلليون گەكتار جەردىڭ ءتيىمسىز پايدالانىپ جاتقانىن ايتقانبىز. ءبىراق بۇل ماسەلەدە جۇمىس ىستەپ جاتقان شارۋاشىلىقتارعا ەشقانداي قىسىم، ياعني جەردىڭ ەكسپروپرياتسياسى بولماۋى كەرەك. ولارعا ورنىنا باسقا جايىلىمدى جەرلەر بەرىپ، جۇمساعان شىعىنىن وتەپ بەرۋىمىز قاجەت. سونىمەن قاتار، اۋىلداردىڭ سانيتارلىق جاعدايىن قامتاماسىز ەتۋ وتە ماڭىزدى. ءبىز اۋىلداردى قوعامدىق جايىلىمدارمەن قامتاماسىز ەتىپ، مال شارۋاشىلىعىن ءتيىمدى دامىتۋ ءۇشىن كووپەراتيۆتەر قۇرىپ، جاڭا فەرمەرلىك شارۋاشىلىقتاردى ۇيىمداستىرۋىمىز كەرەك. جۇمىس توبىندا جايىلىم تۋرالى زاڭدى كۇشەيتۋ، قوسالقى شارۋاشىلىق تۋرالى ارنايى زاڭ قابىلداۋ ۇسىنىستارى ايتىلدى»، - دەيدى اقىلبەك كۇرىشبايەۆ.

قورىتىندىلاي كەلە، سپيكەر مەملەكەتتىڭ بۇل ماسەلەنى قىسقا مەرزىمدە شەشۋگە بارلىق مۇمكىندىگى بار ەكەنىن ايتتى.

«185 ميلليون گەكتار جايىلىمدىق جەرى بار جانە وسى كورسەتكىش بويىنشا الەمدە 5-ورىنداعى ەل بولا وتىرىپ، اۋىلدىق جەردەگى مالدى اش قۇرساقتا قالدىرۋ - كەشىرىلمەيتىن ارەكەت. اتالعان ماسەلەنى شەشۋدە بارلىق دەڭگەيدەگى اكىمدەرگە ساياسي ەرىك پەن تاباندىلىق كەرەك. ءتىپتى، بۇل جۇمىس اكىمدەردىڭ قىزمەتىن باعالاۋدىڭ نەگىزگى كورسەتكىشى بولۋى كەرەك دەپ سانايمىز. وسى ىسكە مەملەكەتتىك اسا ماڭىزى بار ۇلتتىق جوبا رەتىندە قاراۋعا ءتيىسپىز، ويتكەنى سول اۋىلداردا تۇراتىن كوپشىلىگى - ءوزىمىزدىڭ قازاعىمىز»، - دەدى جۇمىس توبىنىڭ باسشىسى.

اۆتور: ايجان سەرىكجان قىزى