ەلوردادا ەر ادام «تاپسىرىسپەن ادام ءولتىرۋ» دەگەن جازۋى بار كولىكپەن جۇرگەن

كولىك بۇگىن الەۋمەتتىك جەلىلەرگە مونيتورينگ جۇرگىزۋ بارىسىندا ماڭگىلىك ەل كوشەسىندە انىقتالعان.

ەلوردا پوليتسەيلەرى كولىكتى ءبىر ساعاتتىڭ ىشىندە تاپتى. جۇرگىزۋشىنىڭ ايتۋىنشا، ارتقى تەرەزەسىنىڭ شىنىسىندا «تاپسىرىسپەن ادام ءولتىرۋ» جازۋى بار كولىكتى ول ءبىر اي بۇرىن پەتروپاۆل قالاسىندا ساتىپ العان، ءبىراق جازۋدى وشىرمەگەن.

بۇدان باسقا، تەكسەرۋ كەزىندە 27 جاستاعى ەر ادامنىڭ كولىك جۇرگىزۋ قۇجاتتارىنىڭ بولماعانى انىقتالدى.

ول تەحنيكالىق رەگلامەنت تالاپتارىنا سايكەس كەلمەيتىن كولىكتى جۇرگىزگەنى جانە جۇرگىزۋشى كۋالىگىنىڭ بولماعانى ءۇشىن ق ر اكىمشىلىك قۇقىقبۇزۋشىلىقتار تۋرالى كودەكستىڭ 590-بابىنىڭ 5-ءبولىمى جانە 612-باپتىڭ 5- ءبولىمى بويىنشا اكىمشىلىك جاۋاپقا تارتىلدى.

كولىك كوممۋنالدىق تۇراققا قويىلدى، ونداعى جازۋدى جۇرگىزۋشىسى سول جەردە ءوشىرىپ تاستادى.