تۇركىستان قالاسى ءۇش باعىتتا دامىپ كەلەدى - ءومىرزاق شوكەيەۆ
«تۇركىستان قالاسى قايتا تۇلەۋدى باستادى. ءتۇبى ءبىر تۇركى ەلدەرى رۋحاني ورتالىق رەتىندە قاستەرلەيتىن تۇركىستان قالاسى قازىر الىپ قۇرىلىس الاڭىنا اينالدى، دامۋدىڭ جاڭا ساتىسىنا كوتەرىلدى. قالا قازىر 3 باعىتتا دامىپ كەلە جاتىر. قوجا احمەت ياساۋي كەسەنەسى اۋماعى تولىعىمەن اباتتاندىرىلىپ، كەلۋشىلەرگە قولايلى جاعداي جاسالۋدا. ياساۋي مەن ءرابيعا سۇلتان بەگىم كەسەنەلەرىن قالپىنا كەلتىرۋ، ازىرەت سۇلتان قورىق- مۇراجايىنىڭ اۋماعىن اباتتاندىرۋ، كۇلتوبە كونە قونىسىنىڭ تاريحي ورىندارىن قالپىنا كەلتىرۋ جۇمىستارى قارقىندى جۇرگىزىلىپ جاتىر. تاريحي، مادەني ورتالىق كوز قۋانتاتىنداي جاسالىپ كەلەدى. وسىنداي رۋحاني، مادەني ورتالىقتا ۆيزيت ورتالىعى، «ۇلى دالا» ورتالىعى، ياساۋي مۋزەيى، فاراب كىتاپحاناسى، تەاتر، رەسپۋبليكامىزداعى العاشقى حالىقارالىق تۋريستىك جانە مەيماندوستىق ۋينۆەرسيتەتى سياقتى بىرنەشە ماڭىزدى نىسان بوي كوتەردى»، - دەدى ايماق باسشىسى.
ءومىرزاق شوكەيەۆ تۇركىستان قالاسىنىڭ تۇركى الەمىنىڭ رۋحاني استاناسى بولىپ جاريالانۋىن تاريحي ادىلدىك دەپ باعالايتىنىنن ايتتى.
«بيىلعى جىلدىڭ كوكتەمى وبلىس ءۇشىن جاقسى جاڭالىقتارمەن باستالدى. 31 -ناۋرىزدا «تۇركىستان - تۇركى الەمىنىڭ رۋحاني استاناسى» تاقىرىبىندا وتكەن تۇركى تىلدەس مەملەكەتتەردىڭ ىنتىماقتاستىق كەڭەسىنىڭ بەيرەسمي سامميتى وتە تابىستى اياقتالدى. ءارى تاريحي ادىلدىك ورناپ، تۇركىستان تۇركى الەمىنىڭ رۋحاني استاناسى بولىپ بەكىتىلدى. وسى ورايدا بارشاڭىزدى تۇركىستاننىڭ جاڭا تاريحي كەزەڭىنىڭ باستالۋىمەن قۇتتىقتايمىن»، - دەدى وبلىس اكىمى.
ەسكە سالساق، 31 -ناۋرىزدا ت م ى ك- تىڭ بەيرەسمي سامميتى ونلاين رەجيمدە وتكەن بولاتىن.
اۆتور: ەسىمجان ناقتىباي