اسقار مامين جاڭادان تاعايىندالعان ەكى ءمينيستردى تانىستىردى

None
None
نۇر-سۇلتان. قازاقپارات - ق ر پرەمەر-ءمينيسترى اسقار مامين ۇلتتىق ەكونوميكا، سونداي-اق ەڭبەك جانە حالىقتى الەۋمەتتىك قورعاۋ مينيسترلىكتەرىنىڭ ۇجىمدارىنا جاڭا تاعايىندالعان مينيسترلەر اسەت ەرعاليەۆ پەن سەرىك شاپكەنوۆتى تانىستىردى، دەپ حابارلايدى primeminister.kz.

ۇكىمەت باسشىسى بۇرىنعى ۇلتتىق ەكونوميكا ءمينيسترى رۋسلان دالەنوۆكە، سونداي-اق بۇرىنعى ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆكە اتقارعان جۇمىسى ءۇشىن العىس ايتتى.

جاڭا ۇلتتىق ەكونوميكا ءمينيسترىن تانىستىرا وتىرىپ، اسقار مامين اسەت ەرعاليەۆتىڭ جوعارى كاسىبيلىگى مەن قۇزىرەتتىلىگىن اتاپ ءوتتى. ءتۇرلى جىلدارى ول ەۋروپا قايتا قۇرۋ جانە دامۋ بانكىندە ايماقتىق باس ساراپشى، ق ر پرەمەر-ءمينيسترىنىڭ كەڭەسشىسى، ۇلتتىق ەكونوميكا ۆيتسە-ءمينيسترى، پرەمەر-مينيستر كەڭسەسى باسشىسىنىڭ ورىنباسارى بولىپ جۇمىس ىستەدى.

وسى ۋاقىتقا دەيىن ۇلتتىق ەكونوميكا ءبىرىنشى ۆيتسە-ءمينيسترى قىزمەتىن اتقاردى.


جاڭا ەڭبەك جانە حالىقتى الەۋمەتتىك قورعاۋ ءمينيسترىن تانىستىرا وتىرىپ، اسقار مامين سەرىك شاپكەنوۆتىڭ باتىس قازاقستان جانە اتىراۋ وبلىستارى اكىمدەرىنىڭ ءبىرىنشى ورىنباسارى رەتىندەگى ۇلكەن تاجىريبەسىن اتاپ ءوتتى.

وسى ۋاقىتقا دەيىن س. شاپكەنوۆ ەڭبەك جانە حالىقتى الەۋمەتتىك قورعاۋ ۆيتسە-ءمينيسترى قىزمەتىن اتقاردى.

«مەملەكەت باسشىسى قاسىم-جومارت كەمەل ۇلى توقايەۆ ەلىمىزدىڭ الەۋمەتتىك-ەكونوميكالىق دامۋىنىڭ جاڭا ساياساتىن ىسكە اسىرۋ بويىنشا الدىمىزعا ماڭىزدى مىندەتتەر قويدى. ولار ەكونوميكالىق دامۋ ساپاسىن ارتتىرۋعا، ەكونوميكانىڭ وزىندىك جەتكىلىكتىلىگىنە، سالىق ساياساتىن جەتىلدىرۋگە، ينۆەستيتسيالار تارتۋعا جانە ەكسپورتتى دامىتۋعا باعىتتالعان قۇرىلىمدىق رەفورمالاردى جۇرگىزۋدى قامتيدى»، — دەدى ا. مامين. سونداي-اق پرەمەر-مينيستر الەۋمەتتىك سالانى جاڭعىرتۋ بويىنشا ماڭىزدى مىندەتتەر ىسكە اسىرىلاتىنىن اتاپ ءوتتى.

ەسكە سالا كەتەيىك، ءبىز بۇعان دەيىن ۇكىمەتتىڭ جاڭا قۇرامى بەكىتىلىپ، سەرىك شاپكەنوۆ پەن اسەت ەرعاليەۆتىڭ جاڭادان مينيستر بولعانىن جازعان بولاتىنبىز.

سوڭعى جاڭالىقتار