الماتىدا «بەدەۋلىكتى ەمدەيمىن» دەپ جۇرتتى الداعان الاياق ۇستالدى
ءوزىن مەديتسينا قىزمەتكەرىمىن دەپ تانىستىرعان ايەل بالاسى جوق ايەلدەردى بەدەۋلىكتەن ەمدەيمىن دەپ ۋادە بەرگەن. الايدا، ءىس جۇزىندە ن. ەسىمدى ازاماتشا 1986 -جىلى قىتايدا تۋعان، بۇرىن سوتتالعان جانە ىزدەۋدە بولعان.
«الماتى وبلىسىنداعى ارىپتەستەرىمىزدىڭ ن. اتتى ازاماتشانى الاياقتىق جاساعانى ءۇشىن ىزدەگەنى انىقتالدى. بەلگىلى بولعانداي، سوت بيلىگىنەن جاسىرىنىپ جۇرگەن قىلمىسكەر تاعى بىرنەشە زاڭسىز ارەكەت جاساعان. ءوزىن مەديتسينا مەكەمەسىنىڭ قىزمەتكەرى رەتىندە تانىستىرعان ول ازاماتتارعا بەدەۋلىكتى ەمدەيمىن جانە گينەكولوگيا سالاسىنداعى باسقا دا اۋىر مەديتسينالىق مانيپۋلياتسيالاردى جۇرگىزەمىن دەپ ۋادە بەرىپ، ول ءۇشىن الدىن الا سىياقى تالاپ ەتكەن. زارداپ شەككەندەرمەن كەزدەسكەن كەزدە ءوزىن «التىناي» دەپ تانىستىرعان»، - دەدى تۇركسىب اۋداندىق پوليتسيا باسقارماسى جانىنداعى ءبولىم باستىعى ەرلان ايانبايەۆ.
قازىر كۇدىكتى قاماۋدا. سوتقا دەيىنگى تەرگەۋ قىلمىستىق كودەكستىڭ 190-بابى بويىنشا جۇرگىزىلۋدە. پوليتسيا باسقارماسىنداعىلار الاياقتىق ارەكەت جاسادى دەگەن كۇدىككە ىلىنگەن ايەلدىڭ سۋرەتىن جاريالاپ، ونىڭ ارەكەتىنەن زارداپ شەككەن ازاماتتار بولسا 2955461؛ 87757183505 جانە 87017586760 تەلەفوندار نومىرىنە حابارلاسۋلارىن سۇرايدى.
اۆتور: الما مۇقانوۆا