بالالارعا جاسالاتىن جىنىستىق قىلمىستار ءۇشىن جازا قاتايتىلدى

بۇل تۋرالى ق ر ىشكى ىستەر مينيسترلىگىنىڭ رەسمي وكىلى ءنۇردىلدا وراز ءمالىم ەتتى، دەپ حابارلايدى قازاقپارات ءتىلشىسى.

«مەملەكەت باسشىسى قازاقستان حالقىنا جولداۋىندا كامەلەتكە تولماعاندارعا قاتىستى جىنىستىق قىلمىستار ءۇشىن جازانى قاتاڭداتۋدى تاپسىرعان بولاتىن. كەيبىر زاڭنامالىق اكتىلەرگە ءتيىستى وزگەرىستەر ازىرلەنىپ، پارلامەنتتىڭ قاراۋىنا ەنگىزىلدى. بيىلعى 11-قاڭتاردان باستاپ، بۇل وزگەرىستەر زاڭدى كۇشىنە ەندى. وسىلايشا، بالالارعا قارسى جاسالاتىن جىنىستىق سيپاتتاعى قىلمىستىڭ كەز كەلگەن تۇرىنە جاۋاپكەرشىلىك قاتاڭداتىلدى»، - دەدى رەسمي وكىل مينيسترلىكتە وتكەن ونلاين بريفينگتە.

كامەلەتكە تولماعاندارعا قاتىستى جىنىستىق قىلمىس جاساعانى ءۇشىن سانكسيالار كۇشەيتىلدى.

«ماسەلەن، قىلمىستىق كودەكستىڭ 120-بابى «زورلاۋ» قىلمىسى بويىنشا ايتار بولساق، تومەنگى شەگى 15 جىلدان 17 جىلعا دەيىن باس بوستاندىعىنان ايىرۋعا وزگەرتىلدى. اتا-اناسىنىڭ، وگەي اكەسىنىڭ، پەداگوگتىڭ وسىنداي قىلمىسقا بارعانى ءۇشىن سانكسيا 17 جىلدان 20 جىلعا دەيىن ۇلعايتىلدى. بۇرىن بۇل نورما بويىنشا 12-17 جىل بەكىتىلگەن ەدى»، - دەيدى ن. وراز.

وسىنداي وزگەرىستەر قىلمىستىق كودەكستىڭ 121، 122، 123، 124، 134,144، 312-باپتارىنا دا ەنگىزىلدى.

«بۇل باستاما كامەلەتكە تولماعاندارعا قاتىستى جاسالاتىن زورلىق- زومبىلىق ارەكەتتەرى مەن قىلمىستاردى اۋىزدىقتايدى دەگەن ءۇمىت بار»، - دەيدى نۇردىلدا وراز.

ايتا كەتەيىك، جىل باسىنان بەرى 6484 قىلمىس جاسالدى، ونىڭ 4321 ى تاۋلىك ىشىندە اشىلدى.

اۆتور: ايجان سەرىكجان قىزى