جامبىلدا اۋزىمەن سۋرەت سالىپ، كەستە توقيتىن ەرەكشە قىز تۇرادى

None
None
تاراز. قازاقپارات - جامبىل وبلىسىندا اۋزىمەن سۋرەت سالاتىن ەرەكشە قىز تۇرادى، دەپ حابارلايدى قازاقپارات ءتىلشىسى.

تابيعاتتىڭ سۇلۋلىعى مەن سىر- سىمباتىن، الەمنىڭ ادەمىلىگىن الۋان ءتۇستى بوياۋلارمەن اق پاراققا ءتۇسىرۋ سۋرەتشىلەرگە عانا بەرىلەتىن قابىلەت. اسىرەسە، ەرەكشە جاراتىلعان جانداردىڭ ونەرگە دەگەن قۇشتارلىعى مەن قابىلەتى ءتىپتى بولەك دەسەك، جۇرەگى مەيىرىمگە، كوزى نۇرعا تولى اياجان دا سونداي ايرىقشا قابىلەتكە يە. تالاس اۋدانى، قاراتاۋ قالاسىنىڭ تۇرعىنى اياجان جۋاتاي 24 جاستا. «ءۇمىت» مەكتەپ- ينتەرناتىنىڭ تۇلەگى. بىرنەشە، وبلىستىق، رەسپۋبليكالىق بايقاۋلاردىڭ جەڭىمپازى. ەرەكشە جاراتىلعان ارۋ قىز قالامىن تىستەپ وتىرىپ، سۋرەت سالادى. اياجاننىڭ سىرعا تولى سۋرەتتەرى جانعا جىلۋلىق سىيلاسا، توقىعان كەستەسى، مونشاقتارمەن جاساعان ءتۇرلى اشەكەي بۇيىمدارى كوزدىڭ جاۋىن الادى. مۇنداي ونەر تۋىندىلارىن ءوز كوزىمەن كورمەگەن جان ەكى قولى مەن اياعى دامىماعان ادامنىڭ اۋىزىمەن جاساعان دۇنيەسى دەپ ايتۋى ەكىتالاي. دارىندى اياجاننىڭ ونەرگە، ومىرگە قۇشتارلىعى جوعارى.

«مەن تۋا ءبىتتى وسىلاي جاراتىلعان جانمىن. ءبىراق، تاعدىرىما ەش ۋاقىتتا نالىمادىم. سەبەبى، مەنىڭ ەكى قولىم مەن اياعىم دامىماسا دا، ەستۋ، كورۋ قابىلەتتەرىم ەرەكشە. كۇن ۇزاق جاتا بەرمەي، سۋرەت سالۋ مەن كەستە توقۋدان بولەك، جانىما جاقىن اقىن - جازۋشىلاردىڭ ولەڭىن وقىعاندى جاقسى كورەمىن. نەگە ەكەنى بەلگىسىز سۋرەتتى تۇندە سالۋ ۇنايدى. كومپيۋتەردى جاقسى مەڭگەرگەنمىن»، - دەگەن دارىندى قىز.

جانىنا جاقىن جانداردىڭ قامقورلىعى مەن سۇيىسپەنشىلىگىنە، دەمەۋىنە ءدان ريزا ەكەندىگىن جەتكىزدى. ءوزىنىڭ جاي- كۇيىن باقىتسىزدىققا بالاماي، قورشاعان ورتا، قوعام تۋرالى دا تۇشىمدى ويىن ورتاعا سالدى.

«ورىندالمايتىن ورىنسىز ارماندى ويلاۋدان اۋلاقپىن. مەن ءۇشىن اتقان تاڭ مەن باتقان كۇندى، انامنىڭ اق ءجۇزىن كورە الاتىنىم، ساف اۋامەن تىنىستاي وتىرىپ، ويىمدى جەتكىزۋدىڭ ءوزى ۇلكەن باقىت. باستىسى ەلىمىز الەمدى جايلاعان ىندەتتەن امان شىقسا. ادامدار دەنساۋلىقلىقتىڭ قادىرىن ءبىلىپ، اقشامەن دە الا المايتىن دۇنيەلەردىڭ بار ەكەنىن تەرەڭ تۇسىنسە دەيمىن»، - دەيدى ول.

كەيدە پەندەلىكپەن كۇيكى تىرلىكتىڭ كۇيبەڭىنە شىداي الماي نالىپ، قاجىپ جاتامىز. وسىنداي ساتتە اينالامىزداعى سان ءتۇرلى تاعدىر يەلەرىنىڭ ومىرگە، ونەرگە قۇشتارلىعىنان ساباق الۋ ارتىق ەتپەيدى.

سوڭعى جاڭالىقتار