حاسساق انسامبلى تۇرىكتىڭ «ۇلى سەلجۇقتار» سەريالىنىڭ مۋزىكاسىن ورىندايدى

None
None
نۇر- سۇلتان. قازاقپارات - قازاقستاندىق «حاسساق» انسامبلى تۇرىكتىڭ «ۇلى سەلجۇقتار» سەريالىنىڭ مۋزىكاسىن ورىنداپ، ەكى ەلدىڭ شىعارماشىلىق بايلانىسىنىڭ تىڭ تىنىسىن اشىپ وتىر. تۇرىك رەجيسسەرى ەمرە كونيۋك ەتنو- فولكلورلىق ءانسامبلدىڭ بىرنەشە شىعارماسىن تىڭداپ، توپ مۇشەلەرىمەن سەرىكتەسە جۇمىس جۇرگىزۋگە نيەت بىلدىرگەن، دەپ حابارلايدى قازاقپارات ءتىلشىسى.

جەلىدە تاراعان بۇل اقپاراتتىڭ ىزىمەن قۇرمانعازى اتىنداعى قازاق ۇلتتىق كونسەرۆاتورياسىنىڭ حالىق مۋزىكاسى فاكۋلتەتىنىڭ دەكانى، «حاسساق» انسامبلىنىڭ جەتەكشىسى ەرجان جامانكەيەۆتى اڭگىمەگە تارتىپ كورگەن ەدىك. توپتىڭ جەتەكشىسى 2016 -جىلى «امانات» اتتى بەينەبايان شىققاننان كەيىن قازاقستانمەن قاتار، شەت ەلدەردە اۋديتوريالارى وسە باستاعانىن ايتادى.

«اسىرەسە تۇركيادا تىڭدارماندارىمىز ارتا ءتۇستى. ءبىزدى ول جاقتا «حاسساق قاشان كەلەدى ەكەن» دەپ كۇتىپ جۇرگەندەر كوپ. سول اۋديتوريامىزدىڭ ارقاسىندا تۇركياداعى مۋزىكانتتار مەن كينورەجيسسەرلار دا ءبىزدى تاني باستادى. بۇعان دەيىن كينورەجيسسەرلەردىڭ ءبىرى «امانات» كومپوزيتسياسىن تاريحي سەريالداردىڭ بىرىنە قولدانساق دەپ قولقا سالعان ەدى»، - دەيدى تەلەفون ارقىلى اڭگىمەلەسكەن ەرجان جامانكەيەۆ.

ونىڭ ايتۋىنشا تۇركياداعى قالىڭ تىڭدارمانمەن بىرگە كينورەجيسسەرلەر دە، پروديۋسسەرلەر دە قازاقتىڭ ۇلتتىق ءان- كۇيىنە ەرەكشە نازار اۋدارا باستاعان. كينولارعا مۋزىكا جازاتىن كەردار ەسىمدى مۋزىكانتپەن بىرىگىپ، «حاسساق» توبى سەلجۇقتار تۋرالى تاريحي سەريالعا ارناپ ءبىر مۋزىكانى جازعان ەكەن. ودان بولەك تۇرىك رەجيسسەرى ەكى البومداعى توعىز شىعارمانى الۋدى وتىنگەن.

«ءبىز اۆتورلىق رۇقساتتى بەردىك. «Uyanys: buyuk selcuklu» («ويانۋ: ۇلى سەلجۇقتار» ) سەريالى ءتورت جىلدىق جوبا ەكەن. الداعى ۋاقىتتا ءبىز ءوزىمىزدىڭ ءۇشىنشى البومىمىزدى شىعارامىز. ەندى ولار سول البومداعى تۋىندىلاردى سۇراپ وتىر. ءۇشىنشى البومىمىزدىڭ العاشقى شىعارماسىن جىبەرىپ قويدىق. ەندى ەكەۋىن جولدايمىز»، - دەيدى توپ جەتەكشىسى.

«Uyanys: buyuk selcuklu» سەريالى سەلجۇقتاردىڭ (تۇركى- وعىز اسكەرىنىڭ سول قاناتىن قۇراعان قىنىق تايپاسىنان شىققان اۋلەت) تاريحىنان سىر شەرتەدى. تۋىندىدا سەلجۇقتاردىڭ سوعىسۋ تاكتيكاسى، تۇرىك حالقىنا اكەلگەن جەڭىستەرى باياندالادى.

«ءبىز «حاسساق» توبى كۇنىنە 10-11 ساعاتقا دەيىن دايىندىق جۇمىستارىن جۇرگىزەمىز. كەيدە تۇنگە دەيىن وتىرىپ قالامىز. الايدا وسى ەڭبەكتىڭ جەمىسىن كورىپ وتىرمىز دەۋگە ابدەن نەگىز بار. ونەرگە بارىڭمەن بەرىلسەڭ - ەڭبەگىڭ اقتالادى. كەيبىر شىعارمالار 6 رەپيتيتسيادان كەيىن دايىن بولۋى مۇمكىن. ەڭ جىلدام جازىپ شىققان شىعارمامىز - 3 رەپيتيتسيادا دايىن بولعان تۋىندى. ورتا ەسەپپەن 10-11 رەپيتيتسيادان ءبىر شىعارما جارىققا شىعادى»، - دەگەن ەرجان جامانكەيەۆ توپتىڭ تاريحى جايلى دا ايتىپ ءوتتى.

جالپى «حاسساق» توبى 2013 -جىلدىڭ 1- اقپانىندا قۇرىلعان. ءۇش بەينەبايان، 11-12 شىعارمادان تۇراتىن ەكى تاسپاسى بار. توپ قۇرامىنداعى ونەرپازدار - بەساسپاپتار، ياعني مۋلتيينسترۋمەنتاليستەر. ءبىر شىعارما ىشىندە توپ مۇشەلەرى بىرنەشە اسپاپتى وينايدى. اراسىندا قازاقتىڭ ۇلتتىق 30 اسپابىنا دەيىن وينايتىن مۋزىكانتتار بار ەكەن.

«ءبىز كوبىنەسە شەتەلدەمىز. 2019-2020 -جىلدارى عانا قازاقستاننىڭ قالالارىنا شىعا باستادىق. قىتاي مەن رەسەيدەن، ەۋروپا ەلدەرىنەن كوپ شاقىرتۋ تۇسەدى»، - دەپ ءتۇيدى ەرجان جامانكەيەۆ.

ەسكە سالا كەتسەك قازاقتىڭ ءان- كۇيى مەن دومبىراسىنا تۇرىكتىڭ رەجيسسەرلەرى مەن پروديۋسسەرلەرىنىڭ نازارى اۋىپ كەلە جاتقانى بۇعان دەيىن حابارلانعان ەدى. تۇرىكتىڭ ايگىلى اكتەرى بۋراك ءوزجيۆيت باستى ءرولدى سومدايتىن سەريالدا دا قوبىز تارتىپ جاڭاقورعاندىق ەرجان ارقاباي جوباعا قالاي كەلگەنىن ايتقان بولاتىن.


اۆتور: ايان بەكەن ۇلى


سوڭعى جاڭالىقتار