«كولساي كولدەرى» ۇلتتىق پاركىندە ەكوتۋريزمدى دامىتۋ كونتسەپتسياسى تانىستىرىلدى

تۇجىرىمداما بويىنشا پاركتە زاماناۋي 3 ۆيزيت- ورتالىق، گلەمپينگتەر، كەمپينگتەر ەتنو- اۋىلدار سالىپ، كاراۆانينگكە ارنالعان ورىندار دايىنداۋ كوزدەلەدى. بۇل رەتتە تۋريستىك مارشرۋتتار مەن سوقپاقتاردى دامىتۋعا باستى نازار اۋدارىلادى. كۇردەلى قۇرىلىس بولمايدى. جەڭىل كونسترۋكتسيالار قولدانىلادى.

«كولساي- كولدەرى» مەملەكەتتىك ۇلتتىق تابيعي پاركىنىڭ ديرەكتورى دانيار تۇرعانبايەۆ پاركتەگى ەكوتۋريزمگە ارنالعان ينفراقۇرىلىم قورشاعان ورتاعا زيان كەلتىرمەس ءۇشىن نەگىزگى كولدەردەن الىس بولاتىنىن ايتتى.

«قايىڭدى، كولساي كولدەرىنە بىردە- ءبىر نىسان جاقىن سالىنبايدى. عيماراتتاردىڭ ءبارى تومەن ورنالاسادى. شاتقالدىڭ ىشىنە كىرمەيدى. بۇل - تابيعاتتىڭ سۇرانىسىن، قاجەتتىلىگىن ەسكەرىلىپ جاسالعان تۇجىرىمداما. كونتسەپتسيانىڭ باستى ماقساتى - ەكوجۇيەنى بۇزباۋ. ادامدار جاياۋ نەمەسە ۆەلوسيپەدپەن ءجۇرىپ، تابيعاتقا زيان تيگىزبەي دەمالاتىن جاعدايعا كەلۋىمىز كەرەك. تاعى ءبىر ماقساتىمىز - ەلدىمەكەن تۇرعىندارىن جۇمىسپەن قامتۋ. تەك ءىرى بيزنەس وكىلدەرى ەمەس، جەرگىلىكتى حالىق ءتۋريزمنىڭ پايداسىن كورۋى ءتيىس» - دەدى ول جيىندا.

ءتۋريزمدى دامىتۋدىڭ مەملەكەتتىك باعدارلاماسىنا سايكەس، ەكوتۋريزم جوبالارى دا 2020 -جىلى ناتيجەسىن بەرە باستاۋى ءتيىس.

«الدىن الا ەسەپتەۋلەر بويىنشا تۋريستىك مارشرۋتتاردىڭ سانى ارتادى، جەرگىلىكتى تۇرعىندار ءۇشىن جاڭا جۇمىس ورىندارى پايدا بولادى، قوناق ءۇي قورى كەڭەيەدى جانە شاتىرلار مەن لاگەرلەر ءۇشىن كوبىرەك ورىن بولادى. بۇل رەتتە تابىس جىلىنا 150 ميلليون تەڭگەگە دەيىن وسەدى»، - دەدى - «كولساي كولدەرى» ۇلتتىق مەملەكەتتىك تابيعي پاركىنىڭ باس ديرەكتورى دانيار تۇرعانبايەۆ.

ايتا كەتەيىك، 2019 -جىلى «كولساي كولدەرى» ۇلتتىق پاركىنە 87 مىڭ تۋريست كەلىپ، 30 ميلليون تەڭگە پايدا تۇسكەن. الداعى ۋاقىتتا «كولساي كولدەرى» ۇلتتىق پاركىندە ەكوتۋريزمدى دامىتۋ بويىنشا قوعامدىق كەڭەس قۇرۋ جوسپارلانىپ وتىر.

«دامۋ كونتسەپتسياسىن پاركتىڭ جانىنان قۇرىلاتىن قوعامدىق كەڭەسكە شىعارامىز. سول كەڭەس جان- جاقتى قاراپ، تالقىلاپ بولعان سوڭ ءارى قاراي زاڭعا سايكەس ارەكەت ەتەمىز. ۇلكەن ينۆەستيتسيالىق جوبا ارقىلى نىساندار پايدا بولادى. تۇجىرىمدانى ەرتەڭ بيزنەس وكىلدەرى ينۆەستيتسيالىق جوبامەن كەلگەندە ءبىزدىڭ تالاپتاردى تولىق ءتۇسىنسىن دەپ جاساپ جاتىرمىز. بايقاۋعا قاتىسقان كاسىپكەر ءبىزدىڭ تۇجىرىمداماداعى يدەيا بولعان جاعدايدا عانا جۇمىس ىستەۋگە مۇمكىندىك الادى»، - دەپ ەسكەرتتى ەكولوگيا، گەولوگيا جانە تابيعي رەسكرستار ۆيتسە- ءمينيسترى ەرلان نىسانبايەۆ.

جيىنعا قاتىسقان تۋريستىك قاۋىمداستىقتار، عالىمدار، ساراپشىلار جانە قوعام قايراتكەرلەرى ۇلتتىق پاركتى ارالاپ، بولاشاقتا ينفراقۇرىلىم سالىناتىن ورىندارمەن تانىستى. ءۇمىتتى ينۆەستورلار ءوز جوبالارىن كورسەتتى.