قازاقستاننىڭ ەكولوگيا ءمينيسترى ب ۇ ۇ- نىڭ بيوالۋانتۇرلىلىك سامميتىندە ۇندەۋ جاسادى
«تۇراقتى دامۋ ماقساتىنداعى بيوالۋانتۇرلىلىكتى ساقتاۋعا باعىتتالعان شۇعىل شارالار» دەپ اتالعان جيىن ب ۇ ۇ باس حاتشىسى انتونيۋ گۋتەررەشتىڭ باسشىلىعىمەن ءوتتى، دەپ حابارلايدى قازاقپارات ECO NEWS كانالىنا سىلتەمە جاساپ.
جيىندا ءبىرقاتار مەملەكەت باسشىلارى، ۇكىمەت باسشىلارى مەن مۇشەلەرى مالىمدەمە جاسادى. ماعزۇم مىرزاعاليەۆ تەڭىزگە تىكەلەي شىعا المايتىن دامۋشى ەلدەر اتىنان سويلەدى. ءوز ۇندەۋىندە ول كوروناۆيرۋس پاندەمياسى ادامزات بالاسى مەن تابيعات اراسىنداعى تىعىز بايلانىستىڭ ماڭىزدى ەكەنىن تاعى ءبىر ەسكە سالدى.
«حالىقتىڭ ءومىرىن قامتاماسىز ەتۋ ءۇشىن تەڭىزگە تىكەلەي شىعا المايتىن ەلدەر توبى بيوالۋانتۇرلىلىككە قاتىستى شارالاردى قابىلداۋدى تەزدەتۋگە شاقىرادى. ءبىز جاھاندىق نەگىزدەمەلىك باعدارلاماعا قاتىستى 2020 -جىلدان كەيىنگى كەزەڭگە ارنالعان شارالاردىڭ جوعارى دارەجەدە قابىلدانۋىنىڭ ماڭىزدىلىعىن جەتكىزگىمىز كەلەدى. نەگىزدەمەلىك باعدارلاما تەڭىزگە تىكەلەي شىعا المايتىن ەلدەردىڭ بيوالۋانتۇرلىلىك سالاسىنداعى قاجەتتىلىكتەرىن وتەۋى ءتيىس»، - دەدى مينيستر سامميتتەگى سوزىندە.
م. مىرزاعاليەۆ بيوالۋانتۇرلىلىكتى ساقتاۋ قازاقستاننىڭ ەڭ ماڭىزدى ۇلتتىق مۇددەلەرىنىڭ ءبىرى ەكەنىن ايتتى.
«ءبىزدىڭ ەلىمىز بيوالۋانتۇرلىلىكتى ساقتاۋ جونىندەگى كونۆەنتسيانىڭ جاقتاۋشىسى. الداعى قادامىمىز - 2030 -جىلعا دەيىنگى بيولوگيالىق الۋانتۇرلىلىكتى ساقتاۋ جانە تۇراقتى قولدانۋ كونتسەپتسياسىن قابىلداۋ. قازاقستان ۇكىمەتى تۇراقتى دامۋ ماقساتتارىن جۇزەگە اسىرۋ ءۇشىن ورمان قورىن قورعاۋ جانە جاڭعىرتۋ جۇمىستارىن جۇرگىزۋدە. ەرەكشە قورعالاتىن اۋماقتار كەڭەيىپ جاتىر. جانۋارلاردىڭ ميگراتسياسى ءۇشىن ەكولوگيالىق دالىزدەر جاسالۋدا»، - دەدى ول.
سونىمەن بىرگە م. مىرزاعاليەۆ قازىر مەملەكەت باسشىسى قاسىم- جومار توقايەۆتىڭ تاپسىرماسىمەن ەكولوگيالىق احۋالدى جاقسارتۋ ءۇشىن ورمان قورىندا 2 ميلليارد ەلدى- مەكەندەردە 15 ميلليون اعاش وتىرعىزىلاتىنىن جەتكىزدى. ايتا كەتەيىك، ب ۇ ۇ- نىڭ بۇل سامميتىندە ادامزات بيوالۋانتۇرلىلىك دەگراداتسياسى اسەرىنەن باستان كەشىپ جاتقان داعدارىس تالقىلاندى. مەملەكەتتەر كوشباسشىلارى مەن وكىلدەرى 2020 -جىلدان كەيىنگى كەزەڭدە بيوالۋانتۇرلىلىكتى ساقتاۋ بويىنشا جاسالاتىن جاھاندىق باعدارلاماعا قاتىستى پىكىرلەرىن ءبىلدىردى.
اتالعان باعدارلاما 2021 -جىلى وتەتىن بيوالۋانتۇرلىلىك تۋرالى تاراپتار كونۆەنتسياسىنىڭ 15- كونفەرەنتسياسىندا قابىلدانادى. ونلاين رەجيمدە ءوتىپ جاتقان ءسامميتتى https://webtv.un.org سىلتەمەسى بويىنشا كورۋگە بولادى.