ساپاربايەۆ: ءىسىن جاڭا باستاعان كاسىپكەر قانداي قولداۋ شارالارى بار ەكەنىن بىلمەيدى

كاسىپكەرلىك جانە يندۋستريالدى- يننوۆاتسيالىق دامىتۋ باسقارماسىنىڭ باسشىسى اسپانديار سەيسەبايەۆتىڭ ايتۋىنشا، بۇگىندە بيزنەسمەندەرگە كاسىبىن دامىتۋعا تاماشا مۇمكىندىكتەر بەرەتىن ءتۇرلى باعدارلامالار بار. «بيزنەستىڭ جول كارتاسى» اياسىندا جالپى سوماسى 4,5 ميلليارد تەڭگەگە 85 جوبا سۋبسيديالاندى، 1,1 ميلليارد تەڭگە سوماسىنا 62 جوباعا ءىشىنارا نەسيەلىك كەپىلدىكتەر بەرىلدى. سونداي- اق، بەس كاسىپورىنعا 286,4 ميلليون تەڭگە سوماسىنا ينفراقۇرىلىم جۇرگىزىلدى.

«قاراپايىم زاتتار ەكونوميكاسى» باعدارلاماسى بويىنشا ەكىنشى دەڭگەيلى بانكتەر مەن «اگرارلىق نەسيە كورپوراتسياسى» ا ق ارقىلى جالپى قۇنى 49 ميلليارد تەڭگەنى قۇرايتىن 136 جوبا قارجىلاندىرىلدى. ەكى باعدارلاما اياسىنداعى جوبالاردىڭ باسىم بولىگى وڭدەۋ ونەركاسىبى مەن اۋىل شارۋاشىلىعى سالالارىن دامىتۋعا باعىتتالعان. «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسى بويىنشا 33,5 ميلليون تەڭگەگە جەتى جوبا ماقۇلداندى. قازىر تاڭدا تاعى 20 جوبا قاراستىرىلۋدا. وڭىرلىك كاسىپكەرلەر پالاتاسىنىڭ ديرەكتورى سامات قوساليەۆ «اتامەكەن تاراز» ميكروكرەديتتىك ۇيىمى 401 كاسىپكەرگە 1,6 ميلليارد تەڭگە كولەمىندە قولداۋ كورسەتكەنىن ايتتى. «تاراز» ا ك ك ا ك ك ۇ ك» ا ق باسقارما ءتوراعاسى ولجاس قارجاۋوۆ تۇرعىنداردىڭ تابىسىن ارتتىرۋ پيلوتتىق جوباسى جانە «ەگىستىكتەن سورەگە دەيىن» جوباسى اياسىندا قارجىلاندىرۋدىڭ قانداي تەتىكتەرى ۇسىنىلاتىنىن جەتكىزدى.

كەڭەس بارىسىندا بەردىبەك ساپاربايەۆ تۇرعىنداردىڭ مەملەكەتتىك باعدارلامالاردان حاباردار ەمەستىگىن جانە وزدەرىنىڭ جاڭادان باستاعان كاسىپتەرىنە قانداي قولداۋ شارالارى ۇسىنىلاتىندىعىن بىلمەيتىندىگىن اتاپ ءوتتى. بۇل ورايدا جيىنعا بەينەبايلانىس رەجيمىندە قاتىسقان ءبىرقاتار اۋدان اكىمدەرىنە سىن ايتىلدى.

«بيزنەستىڭ جول كارتاسى» باعدارلاماسىنىڭ ماقساتى - تۇراقتى جۇمىس ورىندارىن ساقتاي وتىرىپ، جاڭا ورىنداردى اشۋ. بۇل وتە ماڭىزدى. دەيتۇرعانمەن، اۋدانداردا باعدارلاما تەتىكتەرىن پايدالانۋعا دەگەن سۇرانىس تومەن. نەگە؟ ماسەلەن، جۋالى اۋدانى تەك ەكى جوبانى ۇسىنعان، ال مويىنقۇم اۋدانىندا بىردە ءبىر جوبا جوق، - دەپ قاتاڭ ەسكەرتتى وبلىس اكىمى.

اگرارلىق سالادا دا جۇمىس قاجەتتى دەڭگەيدە اتقارىلماي وتىر. مويىنقۇم مەن تالاس اۋداندارىندا اۋىل شارۋاشىلىعىن قولداۋ قورى ارقىلى بولىنگەن قارجى تولىقتاي يگەرىلمەگەن. «اگرارلىق نەسيەلىك كورپوراتسيا» ا ق ارقىلى قاراستىرىلعان قارجى دا تولىقتاي قاجەتكە جاراتىلماعان. وبلىس اكىمى وسى ورايدا كورسەتكىشتەردى جوعارىلاتىپ، مەملەكەتتىك باعدارلامالار تۋرالى تۇرعىندار اراسىنداعى ءتۇسىندىرۋ جۇمىستارىن جونگە كەلتىرۋدى تاپسىردى.