ب ۇ ۇ كوروناۆيرۋس پاندەمياسىنان كەيىنگى الەمنىڭ ەكى سەناريىن اتادى
ءبىرىنشىسى - وپتيميستىك سەناري، ول الەم ەلدەرىنىڭ قازىرگى جاعدايدى جەڭە الاتىندىعىن بىلدىرەدى دەيدى. سولتۇستىكتەگى مەملەكەتتەر قالپىنا كەلتىرۋ جوسپارىن جاسايدى، ال دامىپ كەلە جاتقان ەلدەرگە كومەك كورسەتىلەدى.
گۋتەرريش، سونىمەن قاتار، كوروناۆيرۋسقا قارسى ۆاكسينا توعىز اي ىشىندە پايدا بولىپ، بارىنە قولجەتىمدى بولادى دەگەن ءۇمىتىن ءبىلدىردى. ونىڭ پىكىرىنشە، ەگەر الەمدەگى جاعدايلار وسى باعىتتا دامىپ، ەكونوميكا قالپىنا كەلسە، وندا الەم ەكى-ءۇش جىل ىشىندە قالىپتى جاعدايعا ورالۋ باعىتىندا جۇمىس جۇرگىزە باستايدى.
سونىمەن بىرگە، ب ۇ ۇ باس حاتشىسى ەگەر الەم ەلدەرى پاندەمياعا قارسى ءىس-قيمىلداردى دۇرىس ۇيلەستىرمەسە، «پەسسيميستىك» سەناري بولاتىنى تۋرالى دا ەسكەرتتى. ونداي جاعدايدا ۆيرۋستىڭ جاڭا وشاقتارى پايدا بولىپ، دامۋشى ەلدەردەگى جاعداي ناشارلايدى. ۆاكسينا بويىنشا جۇمىستار دا كەشىكتىرىلۋى نەمەسە ول ءۇشىن ۇلكەن باسەكەلەستىك باستالىپ، ەكونوميكالىق مۇمكىندىكتەرى بار ەلدەردىڭ ازۋىندا كەتۋى مۇمكىن.
«ەگەر بۇل سەناري ورىندالسا، سەگرەگاتسيا، پوپۋليزم جانە كسەنوفوبيا قالاي ءوسىپ جاتقانىن كورەمىز»، - دەلىنگەن ماقالادا.
ب ۇ ۇ باس حاتشىسىنىڭ ايتۋىنشا، جاھاندىق قيىندىقتاردى تەك جاھاندىق باسقارۋدىڭ كۇشتى ينستيتۋتتارىنىڭ جانە حالىقارالىق ىنتىماقتاستىقتىڭ كومەگىمەن عانا جەڭۋگە بولادى.