رەسەيلىك دارىگەرلەر: كەتۋگە اسىقپايمىز، ءبىز قازاقستاندىقتارعا كومەككە كەلدىك
«دەلەگاتسيا نەگىزىنەن رەسەي تۇتىنۋشىلار قۇقىعىن جانە ادامنىڭ ءال-اۋقاتىن قورعاۋ سالاسىنداعى قاداعالاۋ جونىندەگى فەدەرالدى قىزمەتتىڭ ماسكەۋ وبلىسىنداعى اۋرۋحانالاردا كوروناۆيرۋستى ەمدەۋگە جۇمىلدىرىلعان دارىگەرلەرىنەن جاساقتالعان. ولاردىڭ قاتارىندا رەابيليتولوگتار، ينفەكتسيونيستەر، پۋلمونولوگتار، ەپيدەميولوگتار بار. نەگىزگى توپ - ماسكەۋ وبلىسىنىڭ دارىگەر ماماندارى. وزدەرىڭىز بىلەسىزدەر، ماسكەۋ وبلىسىندا ىندەت سايابىرسىدى. سوندىقتان وسىنداي دەڭگەيدەگى ماماندار باۋىرلاس قازاقستان رەسپۋبليكاسىنا كومەك كورسەتە الادى. ءىس-قيمىل جوسپارىمىزدى قازاقستاننىڭ دەنساۋلىق ساقتاۋ مينيسترلىگىنىڭ باسشىلىعىمەن كەلىسەمىز»، - دەيدى ولەگ گريدنيەۆ.
سونىمەن قاتار ول رەسەيلىك دارىگەرلەردىڭ قازاقستانعا كەلۋدەگى نەگىزگى ماقساتىن دا ايتىپ بەردى.
«ەڭ الدىمەن پاتسيەنتتەردى امبۋلاتورلىق، گوسپيتالدىك كەزەڭدە كوروناۆيرۋس ينفەكتسياسىنان ەمدەۋ ادىستەرىمىزبەن بولىسكىمىز كەلەدى. رەسەي فەدەراتسياسى تالاي دۇنيەنى باستان كەشىردى. بۇل تاجىريبەمىزدى، پاتسيەنتتەردىڭ جانىن ساقتاپ قالۋ، وتتەگىمەن قامتاماسىز ەتۋ تاجىريبەمىزدى تاراتۋعا دايىنبىز. وسىندا كەلگەن دارىگەرلەردىڭ بارلىعى دا مۇنداي داعدىنى مەڭگەرگەن ءارى ءبىلىمى دە بار. ءبىز قازاقستانداعى احۋالدى ءتۇسىنىپ، ارىپتەستەرىمىزدەن كەڭەسىپ الۋىمىز قاجەت. كەتۋگە اسىعاتىن ويىمىز جوق، كومەككە كەلدىك قوي»، - دەدى ول.
بۇعان دەيىن رەسەيدەن ءبىر توپ دارىگەردىڭ قازاقستانعا كەلگەنىن حابارلاعان ەدىك.