جاسوتاندىقتار ەلباسىن قۇتتىقتاۋ ءۇشىن ونلاين چەللەندج ۇيىمداستىردى

چەللەندج اياسىندا قازاقستان وڭىرلەرىندەگى مادەنيەت جانە سپورت وكىلدەرى، جاس كاسىپكەرلەر، مەملەكەتتىك قىزمەتشىلەر مەن جاستاردىڭ قاتىسۋىمەن 100 دەن اسا بەينەروليكتەر جاريالاندى.

سپيكەرلەر ەلباسىنىڭ سۋرەتى بەينەلەنگەن جەيدە كيىپ، ن. ءا. نازاربايەۆپەن بايلانىستى ءوز ەستەلىكتەرىمەن ءبولىستى.

«بۇدان باسقا، «Jas Otan» جاستار قاناتىنىڭ قىزمەتكەرلەرى مەن بەلسەندىلەرى #Elbasymenbirge حەشتەگىمەن ەلباسىنا ارنالعان قۇتتىقتاۋ پوستتارىن جاريالاۋدا.

وسى اكتسياعا جاستار قاناتىنىڭ 3000 نان استام بەلسەندى مۇشەلەرى قاتىسىپ، Facebook جانە Instagram جەلىلەرىندە 500 دەن استام پوست جاريالاندى. جاسوتاندىقتار ءوز ەستەلىكتەرىمەن ءبولىسىپ، ەلباسىعا دەگەن جىلى لەبىزدەرىن ءبىلدىردى»، - دەلىنگەن «Jas Otan» جاستار قاناتىنىڭ حابارلاماسىندا.

اتالعان چەللەندجگە كينواكتريسا، قازاقستاننىڭ ەڭبەك سىڭىرگەن قايراتكەرى، كانن كينوفەستيۆالىنىڭ جۇلدەگەرى سامال ەسلياموۆا، ەركىن كۇرەستەن قازاقستاندىق بالۋان، وليمپيادا ويىندارىنىڭ قولا جۇلدەگەرى، ازيا چەمپيونى، حالىقارالىق تۋرنيرلەردىڭ چەمپيونى جانە جۇلدەگەرى اقجۇرەك تاڭاتاروۆ، «ق ر پرەزيدەنتىنىڭ «بولاشاق» حالىقارالىق ستيپەندياسى ستيپەندياتتارىنىڭ قاۋىمداستىعى» قوعامدىق بىرلەستىگىنىڭ اتقارۋشى ديرەكتورى لاۋرا دەمەسىنوۆا، «ۆولونتەرلەر ليگاسى» ق ق ءتورايىمى ايسۇلۋ ەرنيازوۆا، «نۇر-سۇلتان قالاسى جاستار ساياساتى ماسەلەلەرى باسقارماسىنىڭ» باسشىسى داۋلەت كارىبەك جانە باسقالار قاتىستى.