ىندەت كەزىندە كۇيزەلىسكە تۇسپەۋدىڭ جولى قانداي: پسيحولوگتار كەڭەسى

«مۇنداي جاعدايدا ادامعا ءوزىنىڭ كوڭىل- كۇيىن باقىلاۋدا ۇستاۋ قيىن بولىپ جاتادى. دەگەنمەن، ونى باسقارۋدى ۇيرەنۋ جانە پوزيتيۆتى ارناعا تۇسە ءبىلۋ وتە ماڭىزدى. مۇنى ۇيرەنىپ العان ادام ءوزىنىڭ كوڭىل- كۇيى مەن دەنساۋلىعىن جاقسارتا الماق»، - دەدى ەلورداداعى №9 ەمحانانىڭ پسيحولوگى تايسس دۋكۆاگايەۆا.

پسيحولوگتار اقپارات كوزدەرىن سۇزگىدەن وتكىزىپ، سوڭعى اقپاراتتاردى تەك رەسمي مەملەكەتتىك ورگانداردان الۋعا كەڭەس بەرەدى. بۇل رەتتە اقپاراتتار اعىنىنا بوي الدىرىپ كەتپەي، جاڭالىقتاردان، الەۋمەتتىك جەلىدەن نازاردى باسقا جاققا اۋدارعان ءجون. ءوز ءومىرىڭ، قۋانىشتى ساتتەرىڭ جايلى ويلانۋ كەرەك.

«ۋاقىتىڭىزدى وتباسىڭىزبەن وتكىزىپ، جاقىندارىڭىزبەن اڭگىمەلەسىڭدەر. ادەبي كىتاپ وقۋعا دا كوڭىل بولگەن دۇرىس. سۇيىكتى فيلمدەرىڭىزدى كورىڭىزدەر. سۇيىكتى مۋزىكاڭىزدى قوسىپ، كوتەرىڭكى كوڭىل- كۇيمەن ءۇي شارۋاسىمەن اينالىسىڭىزدار»، - دەپ كەڭەس بەرەدى ماماندار.

كۇيزەلىستەن ارىلۋ ءۇشىن تاڭەرتەڭ ازداپ جۇگىرىپ، تىنىس الۋ جاتتىعۋلارىن جاساۋ دا ماڭىزدى. كۇندەلىك جۇرگىزىپ، وعان ءوزىڭنىڭ ويىڭدى، قۋانىشىڭ مەن رەنىشىڭدى ءتۇرتىپ وتىرۋ دا شابىتتانۋدىڭ جاقسى ءتاسىلى سانالادى.

«ناقتى فاكتى بويىنشا ءدال قازىر نە بولىپ جاتقانىنا نازار اۋدارىپ، الداعى ۋاقىتقا الاڭداۋشىلىق تانىتپاڭىز. بۇقارا اراسىندا، الەۋمەتتىك جەلىدە تاراپ جۇرگەن وسەك- اياڭعا ەش ۋاقىتتا سەنبەڭىز. ادامداردىڭ پىكىرلەرىنە دە ەرىپ كەتپەۋ قاجەت. ەگەر ءسىز اقىل- ويىڭىزدى تازا ساقتاپ قالا الساڭىز، وندا ۇرىستا جارتىلاي جەڭىسكە جەتتىڭىز دەگەن ءسوز»، - دەدى تايسس دۋكۆاگايەۆا.

اۆتور: مارلان جيەمباي