كارانتين رەجيمىن بۇزۋشىلار جازاسىن قالاي وتەپ جاتىر؟
بۇل ىشكى ىستەر ورگاندارىنىڭ اكىمشىلىك جازاعا تارتىلعانداردى ارنايى وقشاۋلاۋعا الاتىن ورنى. مۇندا سوت شەشىمىمەن اكىمشىلىك قاماۋعا الىنعان تۇلعالار، قوعامدىق ءتارتىپتى بۇزشىلار وتىرادى.
«بۇل بىلايشا ايتقاندا، شاعىن تۇرمە. مۇندا ادام قاتاڭ بەلگىلەنگەن تارتىپپەن ءجۇرىپ-تۇرادى. سەرۋەندەۋ، تاماق ءىشۋ، ۇيىقتاۋ مەرزىمى قاتاڭ تارتىپپەن باقىلانادى. قاماۋداعى ازاماتتاردىڭ بارلىعى، ايەلدەرى دە، ەرلەرى دە، وسى تارتىپكە باعىنادى»، - دەدى قالالىق پوليتسيا دەپارتامەنتىنىڭ اكىمشىلىك پوليتسيا باسقارماسىنىڭ باسشىسى جاندوس مۇراتاليەۆ.
بۇل مەكەمەنىڭ ءىشى بىرنەشە بەينەكامەرالارمەن جابدىقتالعان. كەزەكشى پوليتسيا قىزمەتكەرى قاماۋداعى تۇلعالاردىڭ ءجۇرىس-تۇرىسىن باقىلاپ تۇرادى. كامەرالاردا ەڭ كوپ دەگەندە 10 ادام وتىرادى. تازا اۋاعا سەرۋەندەۋگە شىققاندا دا ارنايى جاسالعان توردىڭ ىشىندە جۇرەدى.
«ءبىرىنشى تۇسكەن ادام بۇل جەرگە باستاپقىدا ۇيرەنە المايدى. ادامداردى قوعامدىق ءتارتىپتى ساقتاۋعا شاقىرامىن. ءتۇرلى ناشاقور، ماسكۇنەم، بۇزاقىلارمەن بىرنەشە كۇن بىرگە وتكىزگەنشە، ۇيدە كارانتين ءتارتىبىن بۇزباي وتىرۋ اناعۇرلىم دۇرىس»، - دەدى مۇراتاليەۆ.
ايتا كەتۋ كەرەك، الماتىدا 19- ناۋرىزدان باستاپ توتەنشە جاعداي تۋرالى زاڭنامانى بۇزعانى ءۇشىن 346 ادام اكىمشىلىك جاۋاپكەرشىلىككە تارتىلعان. سوت شەشىمىمەن 172 ادام اكىمشىلىك قاماۋعا الىنسا، قالعانىنا ايىپپۇل سالىنعان.