قازاقستاندىقتاردىڭ بانكتەگى شوتتارىنا قويىلعان شەكتەۋلەر الىنادى

بۇل تۋرالى ق ر قارجى مينيسترلىگى مەملەكەتتىك كىرىستەر كوميتەتىنەن ءمالىم ەتتى، دەپ حابارلايدى قازاقپارات.

مەملەكەت باسشىسىنىڭ تاپسىرماسىن ورىنداۋ شەڭبەرىندە مەملەكەتتىك الەۋمەتتىك ساقتاندىرۋ قورىنان توتەنشە جاعدايعا بايلانىستى تابىسىنان ايىرىلعان ادامدارعا 42500 تەڭگە سوماسىندا اي سايىنعى الەۋمەتتىك كومەك اۋدارۋ باستالدى.

«وسىعان وراي، اۋماقتىق مەملەكەتتىك كىرىستەر دەپارتامەنتتەرى تاۋەكەل دارەجەسى جوعارى سالىق تولەۋشىلەردى قوسپاعاندا، دارا كاسىپكەر رەتىندە تىركەۋدە تۇرعان جەكە تۇلعالارعا جانە جەكە پراكتيكامەن اينالىساتىن تۇلعالارعا قاتىستى شىعارىلعان بانك شوتتارى بويىنشا شىعىس وپەراتسيالارىن توقتاتا تۇرۋ تۋرالى وكىمدەر مەن ينكاسسالىق وكىمدەردى قولداپ كەرى قايتارۋدا. سونداي-اق، كوميتەت تاراپىنان ادىلەت مينيسترلىگىنە جانە جەكە سوت ورىنداۋشىلاردىڭ رەسپۋبليكالىق پالاتاسىنا بۇرىن شىعارىلعان سوت بۇيرىقتارى مەن شەشىمدەرىن، سونداي-اق جىبەرىلگەن سالىق بۇيرىقتارى بويىنشا ازاماتتاردىڭ كەز كەلگەن شوتتارىنا سالىنعان تىيىم سالۋدىڭ ارەكەتتەرىن ۋاقىتشا توقتاتا تۇرۋدى جانە جەكە تۇلعانىڭ بەرەشەگىن ءوندىرىپ الۋ تۋرالى ورىنداۋداعى سالىق بۇيرىقتارى بويىنشا تىيىم سالۋدى توقتاتا تۇرۋدى سۇراپ، حات جولدادى»، - دەلىنگەن اقپاراتتا.

ەسكە سالا كەتەيىك، وسىعان دەيىن ميكرو، شاعىن نەمەسە ورتا كاسىپكەرلىك سۋبەكتىلەرى ساناتىنا جاتقىزىلعان سالىق تولەۋشىلەر ءۇشىن سالىقتاردىڭ بارلىق ءتۇرى مەن الەۋمەتتىك تولەمدەر بويىنشا تولەم مەرزىمى 2020-جىلدىڭ 1- ماۋسىمىنا دەيىن كەيىنگە قالدىرىلدى. سونداي-اق تاۋەكەل دارەجەسى جوعارى سالىق تولەۋشىلەردى قوسپاعاندا، سالىق جانە كەدەن بەرەشەگىن، الەۋمەتتىك تولەمدەر بويىنشا بەرەشەكتى ماجبۇرلەپ ءوندىرىپ الۋ شارالارىن جانە مەرزىمىندە ورىندالماعان سالىق مىندەتتەمەسىن ورىنداۋدى قامتاماسىز ەتۋ تاسىلدەرىن قولدانۋ اعىمداعى جىلدىڭ 1- ماۋسىمىنا دەيىن توقتاتىلدى (ق ر ۇكىمەتىنىڭ 2020-جىلعى 27- ناۋرىزداعى 141№ قاۋلىسىنىڭ 4.1) جانە 4.2) - تارماقشالارى).