تانىمال ءانشى يبراگيم ەسكەندىر ەلورداداعى اسكەري جيىنعا قاتىسۋعا ءوتىنىم بەردى

2- ءساۋىر كۇنى مەملەكەت باسشىسى قاسىم-جومارت توقايەۆ اسكەري مىندەتتىلەردى ارناۋلى جيىنعا شاقىرۋ تۋرالى جارلىق شىعارعان ەدى.

«پرەزيدەنت جارلىعىنان كەيىن ەلىمىزدەگى بارلىق قورعانىس ىستەرى جونىندەگى دەپارتامەنتتەر قىزۋ ىسكە كىرىسىپ كەتتى. جەرگىلىكتى اتقارۋشى ورگاندار اكىمدىكتەرمەن بىرلەسىپ، بارلىق ايماقتاردىڭ اۋماقتىق قورعانىس بريگادالارى قۇرامىندا تىركەلگەن اسكەري مىندەتتىلەردى دارىگەرلىك كوميسسياعا شاقىرىپ، ساراپتاۋ جۇمىسىن جۇرگىزىپ جاتىرمىز. نۇر-سۇلتان قالاسى بويىنشا 100 اسكەري مىندەتتىنى ساپقا الۋ جوسپارلانىپ وتىر. مۇندا ءوز ەركىمەن كەلىپ جاتقان زاپاستاعى وفيتسەرلەر مەن سەرجانتتار كوپ»، - دەدى نۇر-سۇلتان قالاسى قورعانىس ىستەرى دەپارتامەنتى باسپا ءسوز قىزمەتىنىڭ باسشىسى عاني ارتىقوۆ تىلشىلەرگە بەرگەن سۇحباتىندا.

ونىڭ ايتۋىنشا، بۇگىن ەلوردادا 50 ادامدى دارىگەرلىك تەكسەرۋدەن وتكىزۋ جوسپارلانعان، ءىس جۇزىندە 160 ادام تەكسەرۋدەن وتكەن. اسكەري مىندەتىن وتەۋگە كەلگەن ەرىكتىلەر اراسىندا تانىمال ءانشى، بوكسشى، زاپاستاعى لەيتەنانت يبراگيم ەسكەندىر دە بار.

«ءبىزدىڭ باتىر بابالارىمىز ەل باسىنا كۇن تۋعاندا ەل قورعاپ شىققان ەدى. بەيبىت زاماندا دا جىراۋلارىمىز توپ باستاپ، ەلدى ىنتىماققا شاقىرىپ وتىرعان. ەلىمىزدە توتەنشە جاعداي ورىن العان سوڭ، قازاقتىڭ ءبىر بالاسى رەتىندە ەلىمە قوسقان ۇلەسىم بولسىن، سپورتتا دا، ونەردە دە قولداۋىن اياماعان حالقىمىزعا پايدا بولسىن دەگەن نيەتپەن قىزمەت ەتۋگە كەلىپ وتىرمىن. ءوزىم ەۋرازيا ۇلتتىق ۋنيۆەرسيتەتىندە اسكەري كافەدرانى ءتامامدادىم، زاپاستاعى لەيتەنانتپىن. دەزينفەكتسيالىق جۇمىس بولا ما، بلوكپوستقا جىبەرە مە، ەڭبەكتەن قاشپايمىز. ونەردەگى، سپورتتاعى زامانداس باۋىرلارىمدى جۇمىلىپ قىزمەت ەتۋگە شاقىرامىن»، - دەدى يبراگيم ەسكەندىر.

تاعى ءبىر اسكەري ەرىكتى، قول كۇرەستەن حالىقارالىق دارەجەدەگى سپورت شەبەرى تيمۋر سىپاتايەۆ توتەنشە جاعدايدا الەۋمەتتىك جەلىدە ونلاين-جاتتىعۋلار ۇيىمداستىرىپ جۇرگەنىن ايتتى.

«پرەزيدەنت جارلىعى شىققان سوڭ، 18 دەن اسقان ءاربىر ەر جىگىت ەلگە، ۇلتقا قىزمەت ەتۋى مىندەتتى. قازىر ەلىمىزدە جانە تورتكۇل دۇنيەدە بولىپ جاتقان قيىن-قىستاۋ زاماندا نەگە حالىققا قىزمەت ەتپەسكە؟ مەن ءوزىم نۇر-سۇلتان قالاسىنىڭ قورعانىس ىستەرى دەپارتامەنتىنە كەلدىم. «تارتىپكە باعىنعان قۇل بولمايدى» دەپ، حالىققا كومەك بەرۋگە ءار كەزدە دايىنمىن»، - دەدى ت. سىپاتايەۆ.

قورعانىس ىستەرى دەپارتامەنتىنىڭ حابارلاۋىنشا، جيىنعا شاقىرىلعان ازاماتتار 3 اي مەرزىمگە دەيىن قالاداعى اۋماقتىق قورعانىس بريگاداسى قۇرامىندا جۇمىس ىستەيدى.

«ولاردىڭ بارلىعى - بۇرىن اسكەري دايىندىقتان وتكەن، ياعني، اسكەري كافەدرا بىتىرگەن، مەرزىمدى اسكەري قىزمەت اتقارعان نەمەسە اسكەري-تەحنيكالىق مەكتەپتەردە كۋرستان وتكەندەر. وسى ازاماتتارعا ق ر اسكەري قىزمەتى جانە اسكەري قىزمەتشىلەردىڭ مارتەبەسى تۋرالى زاڭىنا سايكەس، اسكەري قىزمەتشى مارتەبەسى بەرىلىپ، ولارعا قويىلاتىن زاڭ تالاپتارىنىڭ بارلىعى جۇرگىزىلىپ وتىرادى»، - دەدى عاني ارتىقوۆ.

بۇل ازاماتتار قالاداعى بلوكپوست بەكەتتەرىندە قىزمەت اتقارۋعا جانە پاترۋلدىك قىزمەتتەرگە تارتىلىپ، قالاداعى دەزينفەكتسيالىق جۇمىستاردى جۇرگىزۋگە دە جۇمىلدىرىلاتىن بولادى.

اسكەري جيىنعا شاقىرىلۋشىنىڭ جۇمىس ورنى مەن لاۋازىمى ساقتالادى. جۇمىس انىقتاماسى بويىنشا، جالاقىسى سول مولشەردە تولەنىپ وتىرادى. ال جۇمىسسىز بولسا، ەڭ تومەنگى جالاقى (42 مىڭ تەڭگەدەن استام) كولەمىندە اقى تولەنەدى.