باقىت سۇلتانوۆ فرانسياعا ەكسپورت ءۇشىن جارتى ميلليارد دوللاردىڭ تاۋارلار تىزبەسىن ۇسىندى

«پاريجدە ەۋروپا جانە سىرتقى ىستەر مينيسترلىگى جانىنداعى مەملەكەتتىك حاتشىسى جان- باتيست لەمۋانمەن كەزدەستىم. ول ۇكىمەتتىڭ ساۋدا ماسەلەسىنە جاۋاپ بەرەتىن مۇشەسى، ساۋدا- ەكونوميكالىق ىنتىماقتاستىق جونىندەگى فرانسۋز- قازاقستان ۇكىمەتارالىق كوميسسياسىنىڭ تەڭ ءتوراعاسى بولىپ تابىلادى. ءبىز ماۋسىم ايىندا نۇر- سۇلتان قالاسىندا وتەتىن د س ۇ- نىڭ مينيسترلىك كونفەرەنسياسىنا دايىندىق بارىسىن تالقىلادىق.

فرانسيا بۇل كەزدەسۋگە ۇلكەن ءۇمىت ارتىپ وتىر. ساۋدا- ساتتىقتاعى باسەكەلەستىك جانە پروتەكتسيونيزم ءبىرىڭعاي جانا- جاقتى الەمدىك ساۋدا قاعيدالارى ءۇشىن بارىنشا قاتەرلى، سونداي- اق قازىرگى جاعدايدا دامۋ ءۇشىن سەرپىن بەرۋ قاجەت دەگەن ورتاق پىكىرگە كەلدىك. ساۋدا- ەكونوميكالىق قاتىناستاردى دامىتۋ جايىن تالقىلادىق. 2019 -جىلدىڭ 11 ايىندا قازاقستان مەن فرانسيا اراسىنداعى تاۋار اينالىمى 4 ميلليارد دوللاردى قۇرادى. فرانسياعا قازاقستاندىق ەكسپورتتىڭ % 1 وسكەنىن اتاپ وتەمىز. ءبىز پاريجگە شيكى مۇناي، ۋران، كاتود پەن مىس، بالىق ونەركاسىبى ونىمدەرىن جەتكىزەمىز. وتكەن جىلى ەكسپورت 3,4 ميلليارد دوللاردى قۇرادى»، - دەپ جازدى باقىت سۇلتانوۆ.

ول كەلتىرگەن مالىمەتتەر بويىنشا، فرانسيادان قازاقستانعا ۇشۋ اپپاراتتارى، ءدارى- دارمەك زاتتارى مەن ۆاكسينالار، ەلەكتر ترانسفورماتورلارى جەتكىزىلەدى.

«ارىپتەسىممەن تاۋار اينالىمىن ءوسىرۋ مۇمكىندىكتەرىن دە تالقىلادىق. قازاقستان ءوز ەكسپورتىنىڭ قۇرىلىمىن ءارتاراپتىندىرۋدى ماقسات ەتۋدە. فرانسيالىق ارىپتەستەرگە فرانسيا نارىعى تالاپ ەتەتىن، قۇنى جارتى ميلليارد دوللاردىڭ 85 ءتۇرلى الەۋەتتىك تاۋارلار تىزبەسىن زەردەلەۋدى ۇسىندىم. بىزدە بيداي ۇنىن، مەتاللۋرگيا، حيميا ونىمدەرىن جەتكىزۋدى قوسىمشا ۇلعايتۋ مۇمكىندىكتەرى بار. لەمۋان مىرزامەن بولعان اڭگىمە تاۋار اينالىمىن ءوسىرۋ ءۇشىن بىرلەسە جۇمىس جاساۋعا سەرپىن بەرەدى دەپ سەنەمىن»، - دەپ قوستى مينيستر.

اۆتور: ايدار وسپاناليەۆ