قىتايدا ينتەرپولدىڭ بۇرىنعى ءتوراعاسى سوتتالدى

None
None
بەيجىڭ. قازاقپارات - قىتايدا ينتەرپولدىڭ بۇرىنعى ءتوراعاسى پارا العانى ءۇشىن 13 جىل 6 ايعا باس بوستاندىعىنان ايىرىلدى، دەپ حابارلايدى قازاقپارات شينحۋا اگەنتتىگىنە سىلتەمە جاساپ.

تيانجيڭ  قالاسىنىڭ سوتى 21 - قاڭتاردا قىتايدىڭ بۇرىنعى قوعامدىق قاۋىپسىزدىك ۆيتسە- ءمينيسترى جانە قىتاي تەڭىز پوليتسياسىنىڭ بۇرىنعى ديرەكتورى مەنحونگۆەيدىڭ پاراقورلىق ءىسى بويىنشا العاشقى سوت ۇكىمىن جاريا ەتتى. سوتتالۋشى مەنحونگۆەيگە پارا العانى ءۇشىن 13 جىل التى ايعا باس بوستاندىعىنان ايىرۋ جازاسى تاعايىندالىپ، 2 ميلليون يۋان ايىپپۇل سالىندى.

«شينحۋا» سوتتالۋشىنىڭ سوت شەشىمىنە باعىنعانىن جانە شاعىمدانبايتىنىن مالىمدەدى.

شينحۋا اقپارات اگەنتتىگىنىڭ حابارلاۋىنشا، مەن حونگۆەي قىزمەت ەتكەن كەزدە ول ءوزىنىڭ جاعدايىن پايدالانىپ، جالپى سوماسى 14,46 ميلليون يۋاننان اساتىن ءتۇرلى پارا جيناعان.

ەسكە سالا كەتسەك، مەنحونگۆەي 2016 -جىلدان 2018 -جىلعا دەيىن ينتەرپولدىڭ پرەزيدەنتى بولعان. 2018 -جىلدىڭ قىركۇيەك ايىنىڭ سوڭىندا مەنحونگۆەي ينتەرپولعا ءتوراعالىق ەتۋ كەزىندە فرانسيانىڭ شتاب- پاتەرىنەن قىتايعا ورالعاننان كەيىن بايلانىسىن ۇزگەن.

2018 -جىلعى 8 - قازاندا قىتايدىڭ قوعامدىق قاۋىپسىزدىك مينيسترلىگى مەنحونگۆەيدىڭ پارا الدى دەگەن كۇدىكپەن تەرگەۋ جۇرگىزىلىپ جاتقاندىعى تۋرالى حابارلادى. 2019 -جىلى 10 - مامىردا ونىڭ ۇستىنەن پاراقورلىق بويىنشا قىلمىستىق ءىس قوزعالدى. سوتتىڭ العاشقى وتىرىسى سول جىلدىڭ 20 - ماۋسىمىندا وتكەن ەدى.

اۆتور مۇحتار مۇرات


سوڭعى جاڭالىقتار