اتاۋلى الەۋمەتتىك كومەكتى جالاقى رەتىندە قابىلداۋعا بولمايدى - ناريمان مۇقىشيەۆ

None
None
نۇر-سۇلتان. قازاقپارات – ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ناريمان مۇقىشيەۆ قوستاناي وبلىسىنا جۇمىس ساپارى اياسىندا حالىقتى جۇمىسپەن قامتۋ ورتالىقتارىنا (ح ج ق و) بارىپ، وندا اتاۋلى الەۋمەتتىك كومەك (ا ا ك) كورسەتۋدىڭ جاڭا ەرەجەلەرىن ءتۇسىندىردى، دەپ حابارلايدى اتالعان ۆەدومستۆونىڭ باسپا ءسوز قىزمەتى.

ناريمان مۇقىشيەۆ وڭىردەگى باعدارلاماسىن قوستاناي اۋدانىنىڭ حالىقتى جۇمىسپەن قامتۋ ورتالىعىنا بارۋدان باستادى، ونىڭ قىزمەتكەرلەرى ۆيتسە-ءمينيستردى ا ا ك تاعايىنداۋعا وتىنىشتەردى قابىلداۋ بارىسىمەن تانىستىردى. مۇقىشيەۆ حالىقتى جۇمىسپەن قامتۋ ورتالىعىنىڭ قىزمەتكەرلەرىمەن سويلەسىپ، اتاۋلى الەۋمەتتىك كومەك كورسەتۋدىڭ جاڭا قاعيدالارىن ساپالى ءتۇسىندىرۋ قاجەتتىلىگىنە نازار اۋداردى.

«سىزدەر كونسۋلتاتسيا بەرۋ كەزىندە ازاماتتارعا اقپاراتتى دۇرىس جەتكىزۋلەرىڭىز كەرەك. ا ا ك- ءتى جالاقى رەتىندە قابىلداۋعا بولمايتىنى تۋرالى حابارلاۋ قاجەت. بۇل ومىرلىك قيىن جاعدايعا تاپ بولعان وتباسىلارعا مەملەكەتتىڭ قولداۋى»، - دەدى ناريمان مۇقىشيەۆ.

جاڭا قاعيدالارعا سايكەس، ەگەر وتباسىنىڭ ەڭبەككە قابىلەتتى مۇشەسى جۇمىسپەن قامتۋعا جاردەمدەسۋدىڭ ۇسىنىلعان بەلسەندى شارالارىنان باس تارتسا، وندا ول جانە ونىڭ وتباسىنىڭ بارلىق مۇشەلەرى ا ا ك الۋ قۇقىعىنان ايىرىلادى.

«بۇل نەگىزگى ماسەلە. تاعايىندالعان ا ا ك- كە قاراماستان، وتباسىنىڭ ەڭبەككە جارامدى مۇشەلەرى جۇمىس ىستەۋى ءتيىس. بۇل مەملەكەتتىڭ قولداۋىمەن ومىرلىك قيىن جاعدايدان شىعۋعا كومەكتەسەدى. ءسىز ولارعا بوس جۇمىس ورىندارىن ۇسىناسىز، ال ازاماتتار ءوز كەزەگىندە جۇمىسقا ورنالاسادى»، - دەدى ول.

ول سونداي-اق  ا ا ك الاتىن وتباسىلاردىڭ بالالارىنا اعىمداعى جىلدىڭ اقپان ايىنان باستاپ كەپىلدىك بەرىلگەن الەۋمەتتىك توپتاما ۇسىناتىنىن اتاپ ءوتتى. 1 جاستان 6 جاسقا دەيىنگى بالالار ءۇشىن الەۋمەتتىك توپتاماعا ازىق-تۇلىك جيىنتىقتارى مەن گيگيەنالىق كەرەك-جاراقتار ەنگىزىلگەن. 6 جاستان 18 جاسقا دەيىنگى بالالار ءۇشىن مەكتەپتەردە ىستىق تاماق، وقۋ قۇرالدارى مەن مەكتەپ كيىمدەرىن بەرۋ كوزدەلەدى. سونداي-اق، وسى ساناتتاعى بالالار ءۇشىن مەكتەپكە دەيىنگى جول ءجۇرۋ شىعىندارىن وتەيتىن بولادى. مەديتسينالىق، ونىڭ ىشىندە ستوماتولوگيالىق كومەك 18 جاسقا دەيىنگى بالالارعا تەگىن مەديتسينالىق كومەكتىڭ كەپىلدىك بەرىلگەن كولەمى جانە مىندەتتى الەۋمەتتىك مەديتسينالىق ساقتاندىرۋ شەڭبەرىندە كورسەتىلەتىن بولادى.

بۇدان باسقا، 2020-جىلعى 1- قاڭتاردان باستاپ كامەلەتكە تولماعان 4 جانە ودان دا كوپ نەمەسە 23 جاسقا دەيىنگى كۇندىزگى وقۋ بولىمىندە وقيتىن ستۋدەنت بالالارى بار وتباسىلارعا مەملەكەتتىك جاردەماقى ەنگىزىلدى.

«بۇل مەملەكەتتىك جاردەماقى وتباسىنىڭ تابىسىنا قاراماستان 42496 تەڭگەدەن 74388 تەڭگەگە دەيىن سارالانعان مولشەردە تولەنەدى. قاڭتار ايىندا جاردەماقى تولەۋگە جالپى سوماسى 17,7 ميلليارد تەڭگەنى قۇرادى. رەسپۋبليكا بويىنشا 368 مىڭ كوپبالالى وتباسى، ونىڭ ىشىندە قوستاناي وبلىسىنان 5 مىڭنان استام وتباسى مەملەكەتتىك جاردەماقى الدى»، - دەپ تۇيىندەدى ۆيتسە-مينيستر.

ناريمان مۇقىشيەۆ جۇمىس ساپارى اياسىندا التىنسارين اۋدانى مەن قوستاناي قالاسىنىڭ حالىقتى جۇمىسپەن قامتۋ ورتالىعىندا ءتۇسىندىرۋ جۇمىستارىن جۇرگىزەدى. بۇدان باسقا، ول قوستاناي وبلىسىنىڭ قالالارى مەن اۋداندارىنىڭ اكىمدىكتەرىمەن جاڭا فورماتتاعى ااك تاعايىنداۋ ماسەلەلەرى بويىنشا سەلەكتورلىق كەڭەس جانە الەۋمەتتىك قىزمەتتەر پورتالىندا 2020-جىلعى 1- قاڭتاردان باستاپ تىركەلگەن مۇگەدەكتەردى تەحنيكالىق وڭالتۋ قۇرالدارىن جانە قىزمەتتەرىن ۇسىناتىن ءونىم بەرۋشىلەرمەن كەزدەسۋ وتكىزۋدى جوسپارلاپ وتىر.

بۇدان بۇرىن حابارلانعانداي، اعىمداعى جىلعى 13-14- قاڭتاردا ۆيتسە-مينيستر اقتوبە وبلىسىندا كوپبالالى وتباسىلاردى قولداۋ جانە ا ا ك كورسەتۋ ماسەلەلەرى بويىنشا ءتۇسىندىرۋ جۇمىستارىن جۇرگىزدى.

ەستەرىڭىزگە سالا كەتەيىك، 2020-جىلعى 1- قاڭتاردان باستاپ اشىقتىقتى، ماقساتتىلىقتى، ادىلەتتىلىكتى جانە جۇمىسقا ىنتالاندىرۋدى قامتاماسىز ەتۋ ءۇشىن قازاقستاندا ا ا ك تاعايىنداۋدىڭ جاڭا تەتىگى ەنگىزىلدى. مەملەكەتتىك كومەك شارالارى كەشەندى تۇردە جۇزەگە اسىرىلادى: كوپبالالى وتباسىلارعا بەرىلەتىن مەملەكەتتىك جاردەماقى، جەتىلدىرىلگەن اتاۋلى الەۋمەتتىك كومەك، الەۋمەتتىك جاعدايى تومەن وتباسىلارداعى بالالارعا كەپىلدىك بەرىلگەن الەۋمەتتىك توپتاما.

سوڭعى جاڭالىقتار