قازاقستان ەۋروپالىق وداقپەن ىنتىماقتاستىقتى كەڭەيتۋدە
وعان قازاقستان رەسپۋبليكاسىنىڭ سىرتقى ىستەر ءمينيسترى مۇحتار تىلەۋبەردى قاتىستى. ەۋروپالىق تاراپتى ە و كەڭەسىندە ءتوراعالىق ەتۋشى حورۆاتيا سىرتقى جانە ەۋروپالىق ىستەر ءمينيسترى گوردان گرليچ رادمان تانىستىردى، دەپ حابارلايدى قازاقپارات.
«ە و كەڭەسى وسى كۇنى 2020-جىلعى ناۋرىزدا كۇشىنە ەنەتىن قازاقستان رەسپۋبليكاسىمەن كەڭەيتىلگەن ارىپتەستىك پەن ىنتىماقتاستىق تۋرالى كەلىسىمدى (ك ا ى ك) راتيفيكاتسيالاۋدى اياقتاۋ تۋرالى شەشىم قابىلدادى.
ىنتىماقتاستىق كەڭەسى نەگىزگى فوكۋستى ق ر – ە و ىنتىماقتاستىعىنىڭ ساياسي جانە ساۋدا-ەكونوميكالىق پەرسپەكتيۆالارىن تالقىلاۋعا باعىتتادى. سونداي-اق، تاراپتار الەمدەگى اعىمداعى احۋال تۋرالى پىكىر الماستى»، دەلىنگەن ق ر س ءى م مالىمەتىندە.
سونداي-اق وتىرىس بارىسىندا ورتالىق ازيا جانە ەۋروپا مەن ازيانى ءوزارا بايلانىستىرۋ بويىنشا ە و- نىڭ جاڭا ستراتەگيالارىن ىسكە اسىرۋ جولدارى مەن بىرلەسكەن كۇش-جىگەرلەر تالقىلاندى.
ە و كەڭەسىنىڭ وكىلدەرى حالىقارالىق جانە وڭىرلىك قاۋىپسىزدىك، ساۋدا، ينۆەستيتسيا، ينفراقۇرىلىمدى دامىتۋ، سونداي-اق يننوۆاتسيالار، مادەنيەت، سپورت جانە تۋريزم ماسەلەلەرىن قامتيتىن ىنتىماقتاستىقتىڭ 29 پەرسپەكتيۆالىق باعىتىندا كەلىسىم ەرەجەلەرىن ىسكە اسىرۋ بويىنشا قازاقستانمەن پاندىك جۇمىسقا دايىن ەكەندىگىن ءبىلدىردى.
تاراپتار ساۋدا-ەكونوميكالىق جانە ينۆەستيتسيالىق ىنتىماقتاستىقتى كەڭەيتۋ ءوزارا ءىس-قيمىلدىڭ باسىم باعىتى رەتىندە قاراستىرىلاتىنىنا كەلىستى. ەنەرگەتيكا، كولىك، قورشاعان ورتا، ءبىلىم جانە عىلىم سالاسىنداعى ءوزارا ءتيىمدى ارىپتەستىكتى تەرەڭدەتۋگە ەرەكشە قىزىعۋشىلىق راستالدى.
كەلىسسوزدەر بارىسىندا تاراپتار ق ر پرەزيدەنتى ق. توقايەۆتىڭ بريۋسسەلگە اعىمداعى جىلى جوسپارلانعان ساپارىنىڭ دايىندىعىن تالقىلادى، سونداي-اق وسى جىلى وتەتىن ق ر – ە و جانە ە و - ورتالىق ازيا ىنتىماقتاستىق قۇرىلىمدارى جەلىسى بويىنشا ءىس-شارالاردىڭ كەستەسىن كەلىستى.
ىنتىماقتاستىق كەڭەسىنىڭ وتىرىسى اياقتالعاننان كەيىن قازاقستاننىڭ سىرتقى ساياسي ۆەدومستۆوسىنىڭ باسشىسى ەۋروپالىق ب ا ق ءۇشىن باسپا ءسوز ءماسليحاتىن وتكىزدى.
ەۋروپالىق وداق ق ر نەگىزگى ساۋدا جانە ينۆەستيتسيالىق ارىپتەسى بولىپ تابىلادى، ونىڭ ۇلەسىنە ەلىمىزدىڭ ەكونوميكاسىنا سىرتقى ساۋدا اينالىمى مەن ينۆەستيتسيانىڭ شامامەن جارتىسى تيەسىلى.
قازاقستان 2015-جىلى ە و- مەن كەڭەيتىلگەن ارىپتەستىك پەن ىنتىماقتاستىق تۋرالى كەلىسىمگە قول قويعان ورتالىق ازيا ايماعىنداعى العاشقى ەل بولدى.