سانگەرلەر اڭ تەرىسىن قولدانۋدان جاپپاي باس تارتۋدا

 جالپى بۇل تەندەنسيانىڭ اۋقىمى جىلدان جىلعا كەڭەيىپ كەلەدى. سوعان قاراماستان، فرانسيا بيلىگى جانۋارلار تەرىسىن ءوندىرىس ماقساتىندا قولدانۋعا تىيىم سالار ەمەس. بۇل كورمەگە قاتىسقان برەندتەردىڭ بارلىعى دەرلىك ەكولوگيالىق ماتەريالعا اسا ءمان بەرگەن.

 ماسەلەن، مودەلەر كامەرون كان ءوز تۋىندىلارىن جاساۋدا اڭ تەرىسى مەن بىلعارىنى مۇلدەم قولدانبايدى. كەرىسىنشە، تۇتىنۋعا جارايتىن شيكىزاتتى قايتا وڭدەۋگە جانى قۇمار. سوڭعى كەزدەرى تۇتىنۋشىلاردىڭ دا سۇرانىسى وسىعان سايادى دەيدى ديزاينەر.

كامەرون كان، ديزاينەر:

-  بۇگىندە ءسان الەمىندە سۇرانىس بولەك. تۇتۋنىشى دا، سانگەر دە ماتەريالدىڭ بارىنشا ەكولوگيالىق ءتۇرىن تاڭدايدى. سەبەبى نە ءىشىپ، نە كيەتىنىمىزگە مۇقياتپىز. تابيعات انانى قورعاپ، باعالاۋ قازىر وتە ماڭىزدى. قاراكۇزەننەن جاسالعان ىشىكتى كيۋ بۇگىندە پاريج كوشلەرىندە ساندى ەمەس.

ودان بولەك، ەلدە جانۋارلاردى قورعاۋعا ارنالعان اكسيالار بەلەڭ العان. ءتىپتى اڭ تەرىسىن وندىرىستە قولدانۋعا تىيىم سالاتىن پەتيتسياعا 350 مىڭ تۇرعىن قول قويىپ ۇلگەردى. بۇل دەگەنىڭىز، ەكوجاۋاپكەرشىلىك جىلدان جىلعا كۇشەيىپ كەلەدى دەگەن ءسوز.

ولگا رۋزاد، ينتەرنەت باسىلىمنىڭ باس رەداكتورى:

-  جالپى فرانسيا مەن ەۋروپا ەلدەرى سوڭعى ۋاقىتتا اڭ تەرىسىن قولدانۋدان جاپپاي باس تارتۋدا. كوشەدە ىشىك كيگەن جۇرتتى تابۋ قيىن. ەسكى اۋدانداردا 60-تان اسقان اجەي عانا كيۋى مۇمكىن. جاستار قازىر توننان دا، بىلعارىدان دا باس تارتقان. بۇگىندە ساندە -  ەكولوگيالىق ماتەريالدار.

 كيىم وندىرۋشىلەر دە بۇل سۇرانىستى بىردەن بايقادى. وسىدان ەكى جىل بۇرىن الەمگە ايگىلى فرانسۋز كۋتۋرەسى جان- پول گوتە العاشقىلاردىڭ ءبىرى بولىپ، اڭ تەرىسىنەن باس تارتقان ەدى. قازىرگى تاڭدا ءاربىر بەدەلدى ءسان ءۇيى وسى باستامانى ۇستانىپ كەلەدى.

www.24.kz