ەشكىم بىرگە جۇمىس ىستەگىسى كەلمەيتىن اكتەرلەر

None
None
نۇر-سۇلتان. قازاقپارات - فيلمدى قاراپ وتىرىپ، اكتەردىڭ ويىنى مەن رەجيسسەردى جۇمىسىنا ءتانتى بولامىز.

ولار ءوز كەيىپكەرلەرى ءۇشىن تالاي قۇرباندىققا بارادى: ءبىرى ارىقتايدى، ءبىرى جويىلىپ كەتكەن تىلدەردى مەڭگەرەدى. ءتىپتى، كەيبىرەۋى كەيىپكەرى ءۇشىن تاۋدى باعىندىرادى. ءبىراق، ءتۇسىرىلىم بارىسىنىڭ استاڭ كەستەڭىن شىعارىپ، فيلمنىڭ تۇسىرىلىمىنە جاعىمسىز اسەر ەتەتىن اكتەرلەر مەن رەجيسسەرلەر دە بولادى. بىرەۋى ءوزىنىڭ «جۇلدىز اۋرۋىمەن»، ءبىرى شەكسىز تالابىمەن جاسالعان ەڭبەكتىڭ كۇلىن كوككە ۇشىرادى. بۇگىن سىزدەرگە گولليۆۋد جۇمىس ىستەۋدەن قاشاتىن رەجيسسەرلەر مەن اكتەرلەر ءتىزىمىن ۇسىنامىز.

شايا لاباف

شايا لابافقا مانسابىن ەندى باستاپ كەلە جاتقان اكتەرلەرگە ارناپ، كىتاپ جازۋعا بولادى. ونى «مانساپقا نۇكتە قويۋ ءۇشىن» دەپ اتاسا، بەستسەللەرگە اينالارى انىق. گولليۆۋدتىڭ ناعىز ساياعىنا اينالعان ول كەرەمەت كەڭەستەر بەرەتىنى ءسوزسىز. ونىڭ تاجىربيەسى بويىنشا، الدىمەن، تالانتتى ءارى بولاشاعى زور اكتەر ەكەنىڭىزدى كورسەتىڭىز. ءوزىڭىزدىڭ دارىنىڭىزبەن ستيۆەن سپيلبەرگتىڭ كوزىنە ءتۇسىپ، كاسسالىق جيىنى مول فرانشيزالاردىڭ بىرىنە شاقىرتۋ الىڭىز. كەيىن ءتۇسىرىلىم بىتكەن سوڭ، سپيلبەرگتى ءبىر جامانداپ الىڭىز دا، «ونىڭ تالاپتارى سىزگە عانا ءتان دارا قاسيەتتەردى تۇنشىقتىردى» دەپ ايىپتاڭىز. وسىلايشا، وزگەنى ورعا جىعامىن دەپ، ءوزىڭىز بايقاۋسىزدا ءسۇرىنىپ كەتەسىز. جاي قۇلاماي، تۇبىنە باتقىڭىز كەلسە اركىممەن توبەلەسىڭىز، كەشتەرگە ەسىرتكىمەن نە ماس كۇيىندە كەلىڭىز. بەرلين كينوفەستيۆالىنە باسىڭىزعا «مەن ەندى تانىمال ەمەسپىن» دەگەن جازۋى بار قاعاز پاكەت كيىپ كەلسەڭىز ونىڭ بارلىق كەڭەستەرىن ورىندايسىز. لاباف وردان شىعۋعا تىرىسپادى دەپ ايتا المايمىز. ول سپيلبەرگتەن كەشىرىم سۇراپ، ءوزىن ەندى «تاۋەلسىز» اكتەر رەتىندە كورگىسى كەلەتىنىن جەتكىزدى. ءبىراق، ازىرگە جىل سايىن ول تەك ءبىر فيلمگە ءتۇسىپ ءجۇر. تالانتتى اكتەر ءۇشىن بۇل تىم از. ءبىراق، باسى داۋدان ارىلمايتىن اكتەرمەن جۇمىس ىستەگىسى كەلەتىندەر دە كوپ ەمەس.

ەدۆارد نورتون

ەدۆارد نورتوننىڭ اكتەرلەر اراسىندا بەدەلى اسقاقتاپ تۇر. ونىڭ رەپەرتۋارىنداعى فيلمدەر دە ساپالى. ءبىراق، اكتەرمەن جۇمىس ىستەۋدەن رەجيسسەرلەر نەگە قاشادى؟ بىرىنشىدەن، ونىڭ قوياتىن تالاپتارى وتە جوعارى. تەك وزىنە عانا ەمەس، اينالاسىنداعىلاردى دا اۋرەگە سالادى. ءتۇسىرىلىم بارىسىندا وزىندە نە سەرىكتەسىندە قاتەلىك كەتسە قايتا تۇسىرۋگە ماجبۇرلەيدى. ءتىپتى، رەجيسسەردىڭ «ءبارى جاقسى» دەگەن ءسوزى ونى توقتاتا المايدى. ەكىنشىدەن، نورتون ءبارىن ءوز باقىلاۋىندا ۇستاعاندى جاقسى كورەدى. ءتۇسىرىلىم بارىسىندا ول سەناريگە ءوزى قالاعانداي وزگەرىس ەڭگىزۋى مۇمكىن. كەيدە مونتاج جاساۋ كەزىندە ورتاعا كىرىپ كەتىپ، اقىل ايتا باستايدى. مىسالى، «ەرەكشە حالك» فيلمى كەزىندە ءتۇسىرىلىم توبى نورتوندى مونتاجعا ارالاستىرماي قويعان، ول رەنجىپ، كەيىنگى شارالاردىڭ ەشقايسىنا قاتىسپاعان. ناتيجەسىندە رەجيسسەر ونى ءبارىنىڭ اقىلىمەن ساناساتىن مارك رۋففالوعا الماستىرعان.

دجەيمس كەمەرون

«تەرميناتور»، «تيتانيك» جانە «اۆاتار» سەكىلدى اتاقتى فيلمدەردىڭ رەجيسسەرى دجەيمس كەمەرون - پەرفەكتسيونيست. ەكرانعا شىعاتىن تۋىندىسى ءوزى قالاعانداي بولۋ ءۇشىن ءوزىنىڭ عانا جۇيكەسىن جۇقارتىپ قانا قويماي، اكتەرلەر، ماماندار مەن وپەراتوردىڭ ابدەن مازاسىن الادى. ونىمەن بىرگە جۇمىس ىستەيتىن توپ ونىڭ قاتال ءارى تالعامپاز ەكەنىن جەتكىزگەن. ءار جۇمىس كۇندى ول ازداعان جيىننان جانە «ءبىز ءوز مۇمكىندىكتەرىمىزدىڭ شەكاراسىنان اسۋىمىز كەرەك» دەگەن سوزدەن باستايتىن بولعان. كەمەرونمەن جۇمىس ىستەۋگە اسىق اكتەرلەردى كەزدەستىرۋ وتە قيىن. ەگەر بىرگە جۇمىس ىستەۋ مۇمكىندىگى تۋا قالسا، اۋىر ءارى مازاسىز جۇمىسقا دايىن بولعانى ءجون. گولليۆۋدتا كەمەروندى وسى مىنەزىنە بولا «تەمىر دجيم» دەپ اتايدى.

كريستيان بەيل

باسقالارمەن سالىستىرعاندا، كريستيان بەيل سۇرانىسقي يە اكتەرلەردىڭ ءبىرى. ءبىراق، ونىڭ تانىمالدىلىعى مەن تالانتى رەجيسسەرلەردىڭ قانداي قيىندىققا جولىعاتىنىن جوققا شىعارا المايدى. ەگەر بىرنارسە ۇيلەسپەي قالسا، اكتەردىڭ بىردەن اشۋعا بۋلىعاتىنى، ونىڭ قىزبا مىنەزى اينالاسىنداعىلارعا اسەر ەتپەي قويمايتىن. كريستيان بەيل ءوز جۇمىسىنا وتە جاۋاپتى، ەگەر الدەكىم ونىڭ جۇمىسىنا كەدەرگى كەلتىرسە نەمەسە وپەراتوردا تەحنيكالىق قيىندىقتار تۋعان جاعدايدا، ول ءوزىنىڭ اشۋىن اشىق كورسەتكەن. مىسالى، جەلىدەن «تەرميناتور: قۇتقارۋشى» فيلمىنىڭ ءتۇسىرىلىم بارىسىندا تۋعان قيىندىق كەزىندە وپەراتورعا «قايدا بارۋ كەرەكتىگىن» ەش قىسىلماستان ايتقان بەيلدىڭ اۋديوسى تاراعان بولاتىن. سونىمەن قاتار، ونىڭ ارىپتەستەرىنە ونىڭ ەشقاشان ادامدارمەن جاقىن ارالاسپايتىنى، ءاردايىم تەك ىسكەرلىك اڭگىمەدەن اسپايتىنى ۇناماعان.

بريۋس ۋيلليس

بريۋس ۋيلليس - ناعىز تالانت. ونىڭ فيلمدەرىن كورمەسە دە، اكتەردىڭ ءوزىن تانىمايتىن ادام كەزدەسپەيدى. ءبىراق، ارىپتەستەرى ونى ءوزىن تىم جوعارى باعالايتىن، تۇسىرىلىمگە كەشىگىپ كەلەتىن، ءوزىنىڭ ساحناسىن ۇمىتىپ قالىپ، پرومو شارالارعا كەلمەيتىنىن ايتادى. مىسالى، رەجيسسەر كيەۆين سميت ءوزىنىڭ فيلمىندە تۇسىرىلىمگە اتسالىسقان بارلىق اكتەر مەن ماماندارعا العىس بىلدىرە وتىرىپ، سوڭىنا «ارينە، بريۋس ۋيلليستەن باسقاسى. ويتكەنى، ول ناعىز سۇرقيا» دەگەن بولاتىن. ۆۋدي اللەننىڭ كەيىنگى «اقسۇيەكتەر ءومىرى» (Café Society) اتتى فيلمىندەگى باستى كەيىپكەرلەردىڭ ءبىرىن بريۋس ۋيلليس سومداۋى كەرەك بولعان. ءبىراق، ول العاشقى كۇننەن- اق كەشىگىپ كەلگەن. كەيىن رەجيسسەردىڭ «موتور» سوزىنەن كەيىن سەناريدى وقىماعانىن ايتقان. اللەن شىداماي ۋيلليستى ءتۇسىرىلىم كەزىندە جۇمىستان شىعارعان. مىنە، اكتەر مەن رەجيسسەرلەردىڭ بىزگە بەيمالىم وسىنداي قىرى بار. بارلىق ادامدا مىنەز بولادى. ءبىراق، ونى جۇمىستا بارىنەن بيىك قويۋ قانشالىقتى دۇرىس؟




Massaget.kz


سوڭعى جاڭالىقتار