ءازىلحان نۇرشايىقوۆتىڭ ماحاببات جايلى افوريزمدەرى

جازۋشىنىڭ شىعارماشىلىعى جونىندە تولىق ايتىپ جاتپاي-اق، ءبىر عانا شىعارماسى «ماحاببات، قىزىق مول جىلداردى» ايتساق جەتىپ جاتىر. بۇل رومان وقىرماننىڭ، اسىرەسە جالىندى جاستاردىڭ ەرەكشە ءسۇيىپ وقيتىن ماحاببات گيمنىنە اينالدى. جازۋشىنىڭ ماحاببات جايلى ايتقان افوريزمدەرىن وقي وتىرىڭىزدار!

قىزدار بوس كۇيەۋ تاپقانىنا ەمەس، دوس كۇيەۋ تاپقانىنا قۋانۋى قاجەت. جىگىتتەر كينو، تەاترعا باراتىن جولسەرىك قانا ەمەس، جان سەرىك تاپسا عانا باقىتتى... ۇزاق سويلەسىپ، سىيلاسىپ، سىرلاسىپ، ابدەن بىلىسكەننەن كەيىن، شىن سۇيەتىنىنە، بىرىگىپ، جاراستى ءومىر كەشەتىندەرىنە انىق سەنىسكەن سوڭ عانا ءبىر-بىرىنە ءلاززات قۇشاقتارىن اشسا ابزال. كىرشىكسىز، تازا ماحابباتىڭ تاتتىلىگى سول بولماق.

ماحاببات قادىرىن بىلمەيتىن ادامدا ادامگەرشىلىك سەزىمى بولمايدى، ال ادامگەرشىلىگى جوق كىسىنىڭ جۇرەگىن ماحاببات مەكەندەمەيدى.

قىزدى تاربيەلەۋ - ۇلتتى تاربيەلەۋ.

قىزعا قاتتى كۇلۋدىڭ قاجەتى جوق، جىگىتكە ونىڭ جىميعانى دا جەتىپ جاتىر.

ومىردە ءمىنسىز كىسى بولمايدى. قىزعا جىگىت %100 جاقسى بوپ ەشقاشاندا كەزدەسپەيدى. جىگىتتى %100 جاقسى ەتەتىن ايەل عانا.

كۇشتى ماحاببات قانا كۇيەۋدىڭ بويىنداعى كىناراتتى جەڭەدى. كۇشتى ماحابباتى بار اقىلدى، سابىرلى ايەل عانا جامان جىگىتتەن جار جاساپ الادى.

ەركەككە جۇرەك كەرەك، ايەلگە تىرەك كەرەك.

ەكى ادامنىڭ ءبىر-بىرىنە شىن ىقىلاس پەن قالتقىسىز قىزمەت ەتۋى، نە ارالارىنداعى ادال ماحابباتتىڭ، نە اسىل دوستىقتىڭ ارقاسى.

ءسۇيىپ ۇيلەنۋ عانا قىزىق. ادەمىلىگىنە عانا قىزىعىپ ۇيلەنۋ بازاردان كەرەكسىز نارسەنى جاقسى بولعانى ءۇشىن عانا ساتىپ العانىمەن بىردەي.

ماحاببات بارشا بايلىقتان كۇشتى. ءبىراق كۇشتىگە دە كومەك كەرەك. سول سياقتى ماحاببات ءوزىن بايلىق پەن بارلىقتىڭ قوسا قولداۋىن ۇناتادى.

قىزدىڭ جاقسى جىگىتكە شىعۋى، جىگىتتىڭ جاقسى جار تاڭداپ الۋى جەڭىسپەن پارا-پار. الدىمەن جەڭىسكە جەتۋ قىمبات، ال جەتكەن جەڭىستى باياندى ەتۋ - ودان دا قىمبات.

قىز - ءار حالىقتىڭ اسىل قازىناسى. ول ءوز حالقىنىڭ قانىن جۇرەگىندە ساقتاپ، ونىڭ جانىن بولاشاقپەن جالعاستىرادى.

massaget.kz