بوياۋدا دا بولمىس بار

None
None
نۇر- سۇلتان. قازاقپارات - كەز كەلگەن ءتۇس ادامنىڭ مىنەزىنىڭ قانداي ەكەنىن تانىتادى. اينالاداعىلاردى ءجىتى تانىعىڭ كەلسە، ولاردىڭ قانداي ءتۇستى جاقسى كورەتىنىن ءبىلىپ الىپ، وسى ماقالانى وقىپ شىعىڭىز.

سۇر - بەيتاراپ ءتۇس. ول ەشقانداي پسيحولوگيالىق اسەر تۋدىرمايدى. جۇيكەنى توزدىرمايدى دا تىنىشتاندىرمايدى. ءسىز وسى ءتۇستى جاقسى كورسەڭىز، شۋدان اۋلاق جۇرەتىن ادامداردىڭ قاتارىنداسىز. مامىراجاي تىنىشتىقتى قالايسىز. ءسىزدى ەشكىمگە سىر اشا بەرمەيتىن، توماعا- تۇيىق مىنەزدىلەردىڭ قاتارىنا قوسۋعا بولادى.
كوك ءتۇس - سەزىمتالدىقتىڭ، تۇراقتىلىقتىڭ جانە ادالدىقتىڭ بەلگىسى. بۇل ءتۇستى جاقسى كورەتىن ادام ىلعي مىنەز- قۇلقىنىڭ تەپە- تەڭدىگىنە ۇمتىلادى. ءسال ساتسىزدىككە ۇشىراسا، ەڭسەسى ءتۇسىپ، ءجۇنجىپ كەتەدى. ال بۇل ءتۇستى ۇناتپايتىندار، نەگىزىنەن، مازاسىز الىپ- ۇشپا كەلەدى. ولار ەنجارلىقتى، توقىراپ، تەجەلىپ قالۋدى بىلمەيدى. الايدا اسىعىس شەشىم مەن ءۇستىرت قيمىلدان اۋلاق بولعانى ءجون. اينالاسىنداعىلارعا شىدامدىلىقپەن، تۇسىنىستىكپەن قاراعانى دۇرىس.
جاسىل ءتۇس - تۇراقتىلىقتىن بەلگىسى. مۇنى ادەتتە، بايسالدىلىقتىڭ، جەكە ادامنىڭ وزىنە دەگەن سەنىمىن ارتتىراتىن بايىپتىلىقتىڭ ولشەمى رەتىندە دە قاراستىرادى. جاسىل ءتۇستى جاقسى كورەتىندەر - ءوزىن- ءوزى شىڭداۋعا، جەكە باسىنىڭ جەتىستىگىن ەسەلەۋگە جانى قۇمار جاندار. ادەتتە، مۇنداي ادامدار تىك مىنەزدى، قالايدا ءوزىنىڭ شەشىمىن ىسكە اسىرۋعا تالپىناتىندار. ەرىك- جىگەرى مىقتى، تاباندىلىعىنىڭ ارقاسىندا كەز كەلگەن قيىندىقتى بۇزادى. ءبىراق ولار توڭىرەگىندەگىلەرگە ۇناي قويمايدى. جاسىل ءتۇستى ۇناتپايتىندار، جاس بالاداي وكپەلەگىش بولادى. ىلعي مۇڭى مەن وكپەسىن ايتىپ جۇرەدى. كۇيكى ويلاردىڭ قۇرىعىنان سىتىلىپ شىعايىن دەسە، باتىلدىعى جەتپەيدى.
قىزىل ءتۇس - ومىرگە قۇشتارلىقتىڭ بەلگىسى. ول تابىسى مول قامالعا تايسالماي ۇمتىلاتىن، كەز كەلگەن سالاعا ادام ايتسا سەنگىسىز بەلسەندىلىك تانىتاتىن ادامنىڭ مىنەز- قۇلقىنا ءتان. ەگەر بۇل ءتۇستى جاقسى كورسەڭىز، وندا ءسىز قاۋىرت ءىس- قيمىلداردى اڭساپ، ءوزىڭىزدىڭ سەنىمىڭىزدىڭ اسەرىنە جەلىگىپ جۇرەسىز. ال وسى ءتۇستى جەك كورەتىندەر - نەگىزىنەن، قيانات پەن كيكىلجىڭنەن بويىن اۋلاق سالاتىن، مىنەزى ورنىقتى ادامدار.
سارى ءتۇس - كەڭىستىكتى ياعني قىسىم مەن قورلىقتان ادا ازات ءومىردى بەينەلەيدى. بۇل ءتۇستى جاقسى كورەتىندەر تاۋەلسىزدىككە ۇمتىلادى. ولار ەشقاشان جارقىن بولاشاقتان ءۇمىت ۇزبەيدى، ءوزىنىڭ جوسپارىن جۇزەگە اسىرۋدان ەش ۋاقىتتا باس تارتپايدى. الايدا كۇرت وزگەرىستەرگە قۇمارلىقتىڭ سوڭى ساعىمداي قۇبىلعان الدامشى ماقساتتارعا ەرۋگە ۇلاسۋى مۇمكىن. سوندىقتان شاش ەتەكتەن شىعىنعا باتىپ قالىپ جۇرمەڭىز. ال سارى ءتۇستى ۇناتپايتىنداردىڭ مىنەزىندە ۇستامدىلىق پەن پسيحولوگيالىق بايسالدىلىق جەتىسە بەرمەيدى.
كۇلگىن ءتۇس - ەكى بوياۋدى - كوك پەن قىزىلدى بويىنا جيناعان. الگىندە ايتقانداي، كوك ءتۇس تۇراقتىلىق پەن ادالدىقتى، قىزىل ءتۇستىڭ جىگەرلىلىكتى، قۇشتارلىقتى بىلدىرەتىنى ءمالىم. كۇلگىن ءتۇستى ۇناتاتىندار - ىشكى قاراما- قايشىلىعى مول ادامدار. ولار الداعانعا سەنەدى، ازعىرعانعا كونەدى. سويتە تۇرا، اينالاسىنداعىلارعا ىقپالىن جۇرگىزۋگە كەت ءارى ەمەس. الايدا، ەڭ شەشۋشى ساتتە ياعني شۇعىل شەشىم قابىلداۋ كەزىندە تاسادا قالىپ قويعاندى جاقسى كورەدى. مۇنداي ادامدار جالعىزدىقتان قورقادى. وزىنەن گورى وزگەلەردى دارىپتەپ، ولاردىڭ جامانىن جاسىرىپ، جاقسىسىن اسىرۋعا تىرىسادى.
قوڭىر ءتۇس - اسەرشىلدىكتى بىلدىرەدى. دەنى ساۋ، جىگەرلى ادامدار بۇل ءتۇستى ونشا جاقتىرمايدى، ال ونى جاقسى كورەتىندەر - ابدەن قاجىپ، تىنىعۋدى قالاعان جاندار. ەگەر بۇل ءتۇس ۇناماسا، ءسىز ءبىرىزدىلىكتى، جاتتاندىلىقتى جانە جاداعاي شەشىمدى جەك كورەسىز.
قارا ءتۇس - سىرتقى اسەردى تەجەۋ مەن شەكتەۋ ۇلگىسىن بەينەلەيدى. بۇل ءتۇستى جاقسى كورەتىندەر تاعدىرمەن بەتپە- بەت كەلگەندە، ىلعي جەڭىلىسكە ۇشىراپ، از عانا عۇمىرىن اعىسقا قارسى جۇزۋمەن وتكىزەدى. ەگەر جاقتىرمايتىن بولساڭىز، وندا ءسىز ەش نارسەدەن باس تارتپايسىز، سول ارقىلى ومىرىڭىزدە كوپتەگەن وقيعاعا دۋشار بولىپ، قيىندىق كورۋىڭىز ىقتيمال. سوندىقتان كەيبىر وقيعالاردان باس تارتىپ، الدەكىمدەرمەن ساناسۋعا ۇيرەنگەنىڭىز ءلازىم.

سەيسەن امىربەك ۇلى

«ايقىن»


سوڭعى جاڭالىقتار