مۇحتار ماعاۋين ويلارىنان

***

بۇل تاۋەلسىزدىك - بابالارىمىزدىڭ سوڭعى ەكى جارىم مىڭ جىل بويى توگىلگەن قانىنىڭ تولەۋى بولاتىن، اتالارىمىزدىڭ سوڭعى ءجۇز ەلۋ جىل بويى ەزىلگەن جۇرەگىنىڭ ءلۇپىلى، جانشىلعان نامىسىنىڭ سەرپىنى، قاپاستا ۇزىلگەن ءومىرىنىڭ قارىمتاسى بولاتىن، قۇرساقتا جاتقان، جاڭا عانا كىندىگى كەسىلگەن، قاز تۇرعان، ەندىگى جىلى، ەندىگى عاسىر، ودان سوڭعى زامانداردا دۇنيەگە كەلەتىن سابيلەردىڭ كوز جاسى بولاتىن.

***

حالىقتىڭ ۇلكەندىگى حان كوتەرگەن تۇلعالارىمەن ولشەنەدى.

***

كوپ ءارى ساپالى جازۋ ءۇشىن، تىم كوپ بولماسا دا ءبىرشاما مولعا جەتۋ ءۇشىن وسى ماقساتتا عانا جۇمسالاتىن ۇلان- عايىر ۋاقىتىڭ بولۋى كەرەك. ونەر جولىنداعى ادام ءۇشىن ەڭ قات نارسە - وسى ۋاقىت. جيىرما ءتورت ساعات - جىل ون ەكى اي بوس بولساڭىز دا ۋاقىت تاپشىلىق ەتەدى.

***

ءبىزدىڭ زامانىمىزدا جازارمانداردىڭ بارلىعى دەرلىك بەلگىلى ءبىر كەڭسە قىزمەتىن - كوبىنە گازەت، جۋرنال، باسپا رەداكتسيالارىن تالعاجۋ ەتتى، ياعني، اپتا ارالىق ادەپكى دەمالىس، جىلىنا ءبىر كەلەتىن ايلىق دەمالىس كەزىندە، نەمەسە كۇندەلىكتى جۇمىستان سوڭ، تۇندە جازۋدى ادەتكە اينالدىردى. ءۇزىم- جۇلىپ جاساعان ىستە بەرەكە بولمايدى، ونىڭ ۇستىنە ەكى- ءۇش ەسە قيىندىققا تۇسەدى ءارى دەنساۋلىققا دا زيان. ءبىراق، ءبىزدىڭ اعايىنداردا باسقا امال جوق ەدى - جاننان كەشتى، دەنساۋلىعىن بەردى، ەڭبەك دەڭىز، ەرلىك دەڭىز - جازۋدان قول ۇزبەۋگە تىرىستى.

***

شابىت دەگەن بولادى دەيدى. مەن ءوزىم كورگەم جوق. قىرىق جىلدىق جازۋ تاجىريبەمدى ءسۇزىپ قاراسام، ءبىر- اق رەت سوعان ۇقساس الدەنەندەي ءبىر ەلەس بايقالىپتى. ناقپا- ناق ەسىمدە. مەن - ستۋدەنت، جاڭا باستاعان، قۇنىققان جازارمان، 1961 - جىلى، 9- يانۆار، پۋشكين اتىنداعى رەسپۋبليكالىق كىتاپحانا - تاڭەرتەڭگى ساعات وننان كەشكى ساعات ون بىرگە دەيىن، ەنتىكپەسەم دە، القىنباسام دا، جىن قۋىپ كەلە جاتقانداي سابىرسىز سەرپىنمەن، ءتۇس اۋا تومەندەگى بۋفەتتەن ءبىر شيشا ايران ىشكەن بەس مينۋتتىق ءۇزىلىستى ەسەپتەمەسەك، تۋرا ون ءۇش ساعات بويعى تىنىمسىز شيمايدان سوڭ «ايەل ماحابباتى» دەگەن اجەپتاۋىر كولەمدى اڭگىمە جازىپ شىقتىم.

***

قىرىق جىل جازعاندا كوزىمنىڭ انىق جەتكەنى - شابىت دەگەن جوق نارسە. شابىت جوق. باپ بار، ماشىق بار. باپ - الاڭسىز كوڭىلگە بايلانىستى. ماشىق - كۇندەلىكتى جۇمىسقا بايلانىستى. «ات شاپپايدى، باپ شابادى»، - دەگەن قازاق. ارينە، تۇعىر ەمەس، تۇلپار. بابى كەلىسكەن تۇلپار بابى جوق، ءوزى قاتارلاس، ءتىپتى وزىنەن دە جۇيرىك ەكىنشى كۇلىكتەن وپ- وڭاي وزادى. ءوز مۇمكىندىگىنىڭ شەگىندە شابادى. ءوز مۇمكىندىگىڭىزدىڭ شەگىندە جازۋ - ءسىزدىڭ بابىڭىزعا عانا بايلانىستى. بەس- ون مينۋت، ءبىر ساعات، جارىم ساعات، بەس- ون كۇن ەمەس، ايلار، جىلدار بويى وتىرىس، تىنىمسىز ەڭبەك ناتيجەسى. ماشىقسىز باپ تا جوق. شىعارمانىڭ شەبەرلىك دەڭگەيى، قۋات- كۇشىن باعالايتىن وزەكتى ارقاۋ جاندى جۇيە دە وسى ماشىق پەن باپ بولسا كەرەك.

جازۋشىنىڭ 13 تومدىق شىعارمالار جيناعىنان

دايىنداعان: مەيىرجان اۋەلحان ۇلى

massaget.kz