باتىس قازاقستاندا كوروناۆيرۋسقا شالدىققان 92 ادام اۋىر حالدە جاتىر

ب ق و دەنساۋلىق ساقتاۋ باسقارماسىنىڭ باسشىسى بولاتبەك قايۋپوۆ ءمالىم ەتكەندەي، وڭىردە احۋال وتە كۇردەلى بولىپ وتىر. مەديتسينالىق كومەككە جۇگىنگەندەر سانى ارتا تۇسۋدە. تاۋلىگىنە جەدەل جاردەمگە 1200 دەن استام قوڭىراۋ شالىنادى.

كۇنى بۇگىن جۇقپالى اۋرۋلار جانە پروۆيزورلىق اۋرۋحانادا توسەك سانى 717 بولسا، سونىڭ 72 پايىزىندا ادامدار جاتىر. 30 دان استام ناۋقاس جاساندى تىنىس الۋ اپپاراتىنا قوسىلسا، 52 ادام وتتەگى ماسكاسىن تۇتىنۋدا.

اۋرۋحانالار ءدارى-دارمەكتەرمەن قامتاماسىز ەتىلگەن، تاياۋدا تاعى دا اكەلىنەدى. ءار اۋداندىق اۋرۋحانادا پروۆيزورلىق توسەك-ورىندار اشىلعان. ءتورت اۋداندا جۇقپالى اۋرۋلار توسەك-ورنى بار.

وبلىستىق كوپبەيىندى اۋرۋحانادا 20 دان استام مەدبيكە جانە 30 كىشى قىزمەتكەر، قالالىق اۋرۋحانادا 30 مەدبيكە، 40 كىشى قىزمەتكەر جەتىسپەيدى.

ب. قايۋپوۆتىڭ سوزىنە قاراعاندا، ىندەتپەن كۇرەسكە 700 دەن استام مەديتسينا قىزمەتكەرى جۇمىلدىرىلعان. ولاردىڭ 150 دەن استامى وزدەرى اۋىرىپ، ەمدەلىپ شىقتى.

ناۋقاستار وتە كوپ كەلىپ جاتىر. جاعدايى وتە اۋىر ادامدار ءبىرىنشى كەزەكتە قابىلدانادى.

«ەمدەلۋشىلەردىڭ كوبەيۋىنە بايلانىستى جاڭادان جابدىقتار ساتىپ الۋدامىز. بۇگىن 21 جاساندى تىنىس الۋ اپپاراتى ستاتسيونارعا جەتكىزىلدى. ول ءۇشىن «قپو ب. ۆ.» كومپانياسىنا العىسىمىزدى بىلدىرەمىز. وسى اپتادا وتتەگى كونتسەنتراتورلارى اكەلىنەدى. وبلىستىق اۋرۋحانادا ەكىنشى كورپۋستى اشامىز. بۇل اسا قيىن جاعدايدا جۇمىس جاساپ جاتقان دارىگەرلەرگە تۇسەتىن جۇكتەمەنى ازايتىپ، ەمدەلۋشىلەردى كوبىرەك قابىلداۋعا مۇمكىندىك بەرەدى»، دەدى بولاتبەك امانگەلدى ۇلى.

ەسكە سالا كەتەيىك، بۇدان بۇرىن ورالدىق دارىگەرلەرگە مەملەكەتتىك ناگرادالار تابىس ەتىلگەنىن جازعان بولاتىنبىز.