قازاقستاندا 91,6 پايىز ادام حالىق ساناعىنا قاتىستى

None
None
نۇر-سۇلتان. قازاقپارات - قازاقستاندىقتاردىڭ 91,6 پايىز نەمەسە 17428058 ادام جالپىۇلتتىق حالىق ساناعىنا قاتىستى.

ازاماتتاردىڭ 40,4 پايىزى ساناقتان ونلاين، 51,2 پايىزى وفلاين ءوتتى. بۇل تۋرالى ۇلتتىق ستاتيستيكا بيۋروسىنىڭ باسشىسى نۇربولات ايداپكەلوۆ مالىمدەدى، دەپ حابارلايدى قازاقپارات.

«ساناقتان وتكەندەر سانى بويىنشا الماتى قالاسى كوش باستاپ تۇر. مۇندا ساناققا قاتىسقاندار قاتارى بۇعان دەيىن تىركەلگەن حالىق سانىنا شاققاندا 107,5 پايىز قۇراعان. ياعني، قولدا بار مالىمەت بويىنشا الماتى تۇرعىندارىنىڭ سانى 2005496 دەپ كورسەتىلگەن. ال ساناق ساۋالدارىنا 2154907 ادام جاۋاپ بەرگەن. دەمەك، حالىق ساناعى قازىردىڭ وزىندە مەگاپوليس حالقىنىڭ ناقتى سانىن كورسەتۋگە كومەكتەسەتىنىن سەنىممەن ايتا الامىز»، - دەدى بيۋرو باسشىسى.

ەكىنشى ورىندا - تۇركىستان وبلىسى، وندا حالىق ساناعىنا 98,6 پايىز نەمەسە 2032333 ادام قاتىستى. ءۇشىنشى ورىندا جامبىل وبلىسى، مۇنداعى ساناقتان وتكەندەر سانى حالىقتىڭ 98,6 پايىزىن نەمەسە 1129863 ادامدى قامتيدى.

ءبىر ايتا كەتەرلىگى، ساناققا ونلاين قاتىسۋدا شىعىس قازاقستان وبلىسىنىڭ تۇرعىندارى بەلسەندىلىك تانىتتى مۇندا ساناقتىڭ 57,7 پايىز جاڭا فورماتتا ءوتتى. ەكىنشى ورىندا 52,9 پايىز كورسەتكىشپەن قىزىلوردا وبلىسى تۇر. كوشباسشىلار ۇشتىگىن جامبىل وبلىسى تۇيىندەيدى، وندا تۇرعىنداردىڭ 47,2 پايىز حالىق ساناعىنا ونلاين قاتىستى. ءداستۇرلى فورماتتاعى ساناققا قاتىسۋدىڭ ەڭ جوعارى كورسەتكىشى الماتىدا تىركەلگەن - تۇرعىنداردىڭ 76,1 پايىزى پاتەرلەردى ارالاۋ كەزىندە ساناقتان وتكەن. ەكىنشى ورىندا - 69,6 پايىز كورسەتكىشپەن شىمكەنت، ال ءۇشىنشى ورىندا - الماتى وبلىسى، وندا تۇرعىنداردىڭ 60 پايىزى حالىق ساناعىنا قاتىسۋدىڭ ءداستۇرلى فورماتىن تاڭداعان. بۇعان دەيىن ءبىز الماتى وبلىسىنىڭ بالقاش اۋدانى مەرزىمىنەن بۇرىن ساۋالناما شارالارىن اياقتاعانىن ايتىپ ەدىك.

«وسى الماتى وبلىسىنداعى كەربۇلاق اۋدانىندا ساۋالناما مارەسىنە جەتكەن. حالىق ساناعى اياسىندا مالىمەتتەر جيناۋ جۇمىسى شىعىس قازاقستان وبلىسىنىڭ اباي اۋدانىندا اياقتالدى. ال پاۆلودار وبلىسىن 8 بىردەي اۋدانى (اقتوعاي، جەلەزين، ەرتىس، تەرەڭكول، اققۋلى، ماي، ۋسپەن، شارباقتى) ساناق اياسىندا ساۋالناما جۇرگىزۋ شارالارىن ءبىتىردى»، - دەدى نۇربولات ايداپكەلوۆ.

2021 -جىلعى ۇلتتىق ساناقتىڭ نەگىزگى كەزەڭى قازاقستاندا 1-قىركۇيەكتەن 30-قازانعا دەيىن ءوتىپ جاتىر. قاراشانىڭ 8 نە دەيىن ساناق وتكىزۋ ادىستەمەسىنە سايكەس، ناقتىلاۋ شارالارى قاراستىرىلعان.

سوڭعى جاڭالىقتار