گەرمانيادا ءبىلىمىن جەتىلدىرىپ جۇرگەن قازاقستاندىق 8 ماگيسترانت وقۋدان شىعارىلدى
گەرمانيادا ءبىلىمىن جەتىلدىرىپ جۇرگەن سوت تورەلىگى اكادەمياسى «قۇقىق تانۋ» ماماندىعىنىڭ 8 ماگيسترانتى وقۋدان شىعىپ قانا قويماي، مەملەكەت تولەگەن شىعىندارى مەن شەتەلدە تاعلىمدامادان وتۋىنە جۇمسالعان قارجىنى قايتاراتىن بولدى.
اكادەميا رەكتورى زاۋرەش بايمولدينا قول قويعان بۇيرىققا سايكەس، اتالعان ماگيسترانتتار «جالپى قابىلدانعان مورالدىق-ەتيكالىق نورمالاردى ساقتاماعانى» جانە «ءوز ءىس-ارەكەتىمەن جانە قىلىعىمەن قوعام تاراپىنان سىنعا جول بەرىپ، باسقا مەملەكەتتىك قىزمەتشىلەر تاراپىنان قىزمەتتىك ادەپ نورمالارىن بۇزۋدىڭ جولىن كەسۋ جانە ولاردى بولدىرماۋ جونىندە شارا قابىلداماعانى» ءۇشىن وقۋدان قۋىلىپ وتىر.
ەسكە سالا كەتەيىك، 13- قاڭتاردا جەلىدە شەتەلدە تاعلىمدامادان وتكەن قازاقستاندىق ماگيسترانتتارعا قاتىستى ۆيدەو جاريالانعان بولاتىن.
ق ر جوعارعى سوتى جانىنداعى سوت تورەلىگى اكادەمياسىندا اتالعان ماگيسترانتتارعا قاتىستى ۆيدەوماتەريالدى زەرتتەۋ مەن تەكسەرۋ بويىنشا كوميسسيا قۇرىلعان بولاتىن.
«ءتارتىپ بۇزۋشىلارعا تارتىپتىك جازا قولدانۋ تۋرالى ماسەلەنى شەشۋگە تەكسەرىس قورىتىندىسى بويىنشا جاسالعان كوميسسيا ۇسىنىستارى نەگىز بولادى. اكادەميا ماگيسترانتتارىنىڭ ءتارتىپ بۇزۋشىلىعى راستالعان جانە ولاردى وقۋدان شىعارۋ تۋرالى شەشىم قابىلدانعان جاعدايدا ولاردان وقۋ ءۇشىن مەملەكەت تاراپىنان جۇمسالعان بارلىق قاراجات، وسى شەتەلدەگى تاعلىمدامامەن بايلانىستى بيۋجەتتىك شىعىندار وتەلەدى» دەلىنگەن باسپا ءسوز بايانىندا.