ەلوردا پوليتسەيلەرى ەكى كۇن ىشىندە 6 ميلليون تەڭگەنىڭ ءدارى-دارمەگىن تاركىلەدى

«ءتارتىپ ساقشىلارى جالپى 4,7 مىڭ تابلەتكا، 2 مىڭنان استام فلاكون مەن 400 كاپسۋلا، 80 تەرمومەتر، 26 مىڭنان استام ماسكا مەن 3,5 مىڭ مەديتسينالىق كيىم تۇرلەرىن (حالات، قولعاپ، باس كيىم، كوزىلدىرىك جانە ت. ب. ) تاركىلەدى. جۇرگىزىلگەن ەسەپ بويىنشا، تاركىلەنگەن زاتتاردىڭ جالپى سوماسى 6 ميلليون تەڭگەدەن اسادى»، دەلىنگەن حابارلامادا.

6-شىلدە كۇنى جەدەل-پروفيلاكتيكالىق شارا بارىسىندا ر. قوشقاربايەۆ كوشەسىندە «تويوتا كامري» اۆتوكولىگىنىڭ 30 جاستاعى جۇرگىزۋشىسى ۇستالدى. ونىڭ جۇك سالعىشىنان «سەفترياكسون»، «سەفازولين»، «سۋلامەد»، «ازيتروميتسين»، «ينگاۆەرين»، «ەۋفيللين»، «لەدوكاين» جانە ت. ب. مەديتسينالىق پرەپاراتتاردىڭ ءىرى پارتياسى تابىلدى.

«ايىپتتالۋشى ازامات بۇرىن قىلمىستىق جاۋاپكەرشىلىككە تارتىلىپ، ەكى رەت سوتتى بولعانى انىقتالدى. سونداي-اق پوليتسيا قىزمەتكەرلەرى ساۋدا ورتالىعى تۇراعىندا قاجەتتى قۇجاتتارى جوق ءدارى-دارمەكتەردى ساتپاقشى بولعان 30 جاسار ايەلدى ۇستادى. بۇدان باسقا، وڭتۇستىك- شىعىس شاعىن اۋدانىندا باقىلاۋ كەزىندە «لەدوكاين»، «ەرگوفەرون»، «پاراتسەتامول»، «سەفازولين»، «كالەترا» جانە ت. ب. تاپشى دارىلىك پرەپاراتتاردى ساتقانى ءۇشىن 40 جاستاعى ايەل ۇستالدى»، دەلىنگەن حابارلامادا.

سونىمەن قاتار قالالىق ءدارىحانالارعا تەكسەرۋ جۇرگىزىلىپ، ءبىرقاتار ءدارى- دارمەكتەردىڭ باعاسى كوتەرىلگەنى انىقتالدى. نۇر-سۇلتان پوليتسياسى ازاماتتاردان ءدارى- دارمەكتەردى زاڭسىز ساتۋ دەرەكتەرى انىقتالعان جاعدايدا، جاقىن جەردەگى بولىمشەگە نەمەسە 102 نومىرىنە حابارلاسۋدى سۇرايدى.