كوروناۆيرۋس: فرانسيادا تۇرمەدە وتىرعان 6 مىڭنان استام ادام بوستاندىققا شىقتى

ناۋرىزدىڭ 16-سى مەن ءساۋىردىڭ 1- ءى ارالىعىندا، فرانسيا تۇرمەلەرىندەگىلەر 6266 ادامعا ازايدى. مۇنداي يگى قادامعا ەلدىڭ ادىلەت مينيسترلىگى باستاماشى بولىپ وتىر. بۇعان سەبەپ - تۇرمەدە وتىرعان ءبىر ادام مەن نادزيراتەلدىڭ كوروناۆيرۋستان قايتىس بولۋى. بيلىك وكىلدەرى پاندەميا تۇرمەنى جايلاپ كەتۋى مۇمكىن دەپ ۇرەيلەنىپ وتىر.

فرانسيادا باس بوستاندىعىنان ايىرۋ ورىندارىندا وتىرعان ادامدار وتە كوپ. جالپى العاندا ەلدىڭ پەنيتەنتسيارلىق جۇيەسى 61 مىڭ تۇتقىندى ۇستاۋعا جارايدى. ال 1 - ساۋىردەن باستاپ مەملەكەتتەگى 188 تۇرمەدە 66309 ادام وتىرعان. جازانى ورىنداۋ ۇلتتىق قىزمەتىنىڭ سوڭعى باعالاۋلارى بويىنشا، سوتتالعان 48 ازاماتتان كوروناۆيرۋس تابىلعان، 925 ادام وقشاۋلاندىرىلعان، 300 ادام ەكى اپتالىق كارانتيننەن شىقتى. تۇرمەلەردەگى 42 مىڭ قىزمەتكەردىڭ 114-نەن قاۋىپتى ۆيرۋس انىقتالدى.

تيمۋر دۇيسەكەيەۆ