ۆاكسينا پاسپورتىن قولدان جاساۋ بويىنشا 60 تان استام قىلمىستىق ءىس قوزعالعان

دەنساۋلىق ساقتاۋ ءمينيسترى الەكسەي سوي قازاقستاندىقتارعا وسىنداي ۇندەۋ تاستادى، دەپ حابارلايدى قازاقپارات ءتىلشىسى.

«قازىر ۆاكسينا پاسپورتىن قولدان جاساۋ ارەكەتتەرىمەن قاتتى كۇرەسىپ جاتىر. ءبىز بۇل ىسكە قۇقىق قورعاۋ ورگاندارىن ارالاستىرۋ تۋرالى باستاما كوتەرگەن بولاتىنبىز. مەملەكەت باسشىسى بۇل ماسەلەمەن ناقتى اينالىسۋدى تاپسىرعانىن بىلەسىزدەر. قازىردىڭ وزىندە 60 تان استام قىلمىستىق ءىس قوزعالدى. مۇنداي ارەكەتتەردىڭ جولى قاتاڭ تۇردە كەسىلىپ جاتىر. جارنامالاعان سايتتار بىردەن بۇعاتتالۋدا. ونى ورنالاستىرعان ادامدار قىلمىستىق قۋدالاۋعا الىنادى. قازىر ۆاكسينا پاسپورتىن جارنامالاعان مالىمەتتەر ساۋساقپەن سانايتىنداي دەڭگەيگە تۇسكەنىن كورىپ وتىرمىز. ءاربىر جارناما جويىلىپ، ونىڭ ارتىنداعى ادامدى انىقتاۋعا جەدەل ۋاكىلدەر كىرىسىپ جاتىر. قازىر ۇسىنىستاردىڭ سانى ازايدى. ويتكەنى قاتاڭ شارالار قابىلدانىپ جاتىر. بۇعان دەيىن ساناسىنا جەتپەگەندەر بۇل ارەكەت قاتتى قۋدالانىپ جاتقانىن ءتۇسىندى»، - دەگەن مينيستر جالعان ۆاكسينا پاسپورتىن ساتىپ الۋدى ويلاپ جۇرگەندەرگە قايىرىلدى.

«جالعان پاسپورت ادامدى كوروناۆيرۋستان قورعامايدى. رەانيماتسياعا تۇسۋدەن قورعايتىن قابىلەتى جوق جالعان قۇجاتتىڭ. بۇل ءوز-ءوزىڭدى الداۋ عانا. جالعان قۇجات جاساتقانداردىڭ ءبارى ەرتە مە، كەش پە، ءبارى ءبىر اشكەرە بولادى. ويتكەنى ءبىز سايكەستەندىرۋ جۇمىستارىن جۇرگىزىپ جاتىرمىز. ۆاكسينا ساتىپ الۋعا تىرىسقانداردىڭ ءبارى قاتاڭ جازالاناتىن بولادى. بارشا ازاماتتاردى ءتارتىپ ساقتاپ، زاڭنان اتتاماۋعا ۇندەيمىن»، - دەدى ۆەدومستۆو باسشىسى.