قازاقستاندا الكوگولدەن ۋلانىپ ولگەن 15 ادام: قولدان ىشىمدىك جاساپ ساتقان ءۇش كۇدىكتى ۇستالدى

None
None
قوستاناي. قازاقپارات - قوستاناي وبلىسىندا پلاستيك بوتەلكەگە سپيرتتىك ىشىمدىك قۇيىپ ساتقاندار ۇستالدى، دەپ حابارلايدى قازاقپارات وبلىستىق پوليتسيا دەپارتامەنتى باسپا ءسوز قىزمەتىنە سىلتەمە جاساپ.

بۇعان دەيىن ارقالىق قالاسىندا ءبىر تاۋلىكتە ەتانولدان ۋلانىپ قالعان 11 ادامنىڭ مەرت بولعانى حابارلاندى. وسى فاكت بويىنشا پوليتسيا ق ر ق ك 306-بابىمەن سوتقا دەيىنگى تەرگەۋ امالدارىن باستادى. كەيىننەن اقمولا وبلىسىندا تاعى 4 ادامنىڭ ىشىمدىكتەن ۋلانىپ كوز جۇمعانى بەلگىلى بولدى.

«سپيرتتەن ۋلانۋ جاعدايى اقمولا وبلىسىندا دا تىركەلدى. وندا 4 ادام كوز جۇمدى. الدىن الا بولجام بويىنشا، كىسى ءولىمى جالپى ۋلانۋ اياسىنداعى جەدەل گەمورراگيالىق پانكرەاتيتتەن بولعان. تەرگەۋ بارىسىندا اقمولا وبلىسىندا سپيرتتىك ىشىمدىكتى ساۋداعا شىعارعان سەح انىقتالدى. سەح ىشىنەن ساتىلىمعا شىققالى تۇرعان زياندى ىشىمدىك تاركىلەندى. پوليتسەيلەر ارقالىق قالاسىنداعى 4 دۇڭگىرشەكتەن 46 ليتر ىشىمدىكتى تاپتى. بۇعان قوسا، جەرگىلىكتى كاسىپكەردەن 408 بەس ليترلىك بوتەلكە تابىلدى. الايدا كاسىپكەر سپيرتتىك ىشىمدىكتىڭ ەداۋىر بولىگىن ساتىپ جىبەرگەن. وسى دەرەك بويىنشا پلاستيك بوتەلكەگە سپيرتتى قۇيىپ، ساتقان 3 كۇدىكتى ۇستالدى. ايتا كەتەيىك، بۇل سۇيىقتىق ادام اعزاسىنا اسا قاۋىپتى سانالادى»، - دەيدى وبلىستىق پوليتسيا دەپارتامەنتى باسپا ءسوز قىزمەتىنىڭ جەتەكشىسى يرينا بەجەنار.

پوليسەيلەردىڭ ايتۋىنشا، قاۋىپتى سۇيىقتىق بازارلاردا، جەرتولەلەردە جاسىرىن ساتىلۋى مۇمكىن. سوندىقتان تۇرعىنداردىڭ بارىنشا ساق بولعانى ءجون.

اۆتور: قاسقىرباي قويشىمانوۆ

سوڭعى جاڭالىقتار