بيىل 15 ميلليون شارشى مەتر تۇرعىن ءۇي سالىنادى - اسقار مامين

None
None
نۇر-سۇلتان. قازاقپارات – ق ر پرەمەر-ءمينيسترى اسقار مامين وڭىرلەرگە قۇرىلىس جۇمىستارىن ۋاقىتىلى باستاۋدى تاپسىردى، دەپ حابارلايدى قازاقپارات ءتىلشىسى.

«قازىرگى جاعدايداعى ۇكىمەتتىڭ ەڭ ماڭىزدى مىندەتى - قۇرىلىس قارقىنىن ۇلعايتۋ، حالىقتى تۇرعىن ۇيمەن قامتۋ، جۇمىس ورىندارىن ساقتاۋ جانە جاڭا جۇمىس ورىندارىن قۇرۋ. بۇگىندە قۇرىلىس سالاسىندا شامامەن 700 مىڭ ادام جۇمىس ىستەيدى. وسى جىلى شامامەن 15 ميلليون شارشى مەتر تۇرعىن ءۇي سالۋ جوسپارلانعان. قۇرىلىس يندۋسترياسىن دامىتۋ بويىنشا جوبالار ىسكە اسىرىلاتىن بولادى. بۇل رەتتە قۇرىلىس سالاسى قازىرگى ۋاقىتتا ەكونوميكانىڭ دامۋىنىڭ ماڭىزدى سەكتورلارىنىڭ ءبىرى بولۋى ءتيىس»، - دەدى ا. مامين ۇكىمەت وتىرىسىندا.

وسى ورايدا ول يندۋستريا جانە ينفراقۇرىلىمدى دامۋ مينيسترلىگى مەن اكىمدىكتەر جوسپارلانعان تۇرعىن ءۇي كولەمىن تاپسىرۋدى ءارى بولىنگەن قاراجاتتى تولىق يگەرۋدى قامتاماسىز ەتۋى ءتيىس ەكەنىن ايتتى.

«قۇرىلىس ماۋسىمىن ۋاقىتىندا باستاۋدىڭ ماڭىزى وتە زور. قۇرىلىس ورىندارىنا ينجەنەرلىك ينفراقۇرىلىم جەتكىزۋ بويىنشا 7 ءوڭىر عانا جوبالاردى ىسكە اسىرۋدى باستاعان. بۇل تۇرعىدا اتىراۋ، شىعىس قازاقستان، ماڭعىستاۋ، جامبىل، سولتۇستىك قازاقستان، پاۆلودار جانە تۇركىستان وبلىستارىن اتاپ وتكەن ءجون»، - دەدى ۇكىمەت باسشىسى.

سوڭعى جاڭالىقتار