1414 بايلانىس ورتالىعىنا ءبىر كۇندە 600 مىڭ ادام حابارلاسقان

بۇل تۋرالى ق ر سيفرلىق دامۋ، يننوۆاتسيالار جانە اەروعارىش ونەركاسىبى ۆيتسە-ءمينيسترى ابىلايحان وسپانوۆ ايتىپ بەردى.

«26-ناۋرىزدان باستاپ ەلىمىزدىڭ بارلىق وڭىرىندە حالىققا قىزمەت كورسەتۋ ورتالىقتارى ۋاقىتشا جۇمىسىن توقتاتىپ، ەلەكتروندى ۇكىمەت پورتالىنا اۋىستىرىلدى. ونلاين قىزمەت الۋ تۋرالى حالىققا ۇزدىكسىز كەڭەس بەرۋ ءۇشىن 1414 ءبىرىڭعاي بايلانىس ورتالىعىنىڭ قىزمەتكەرلەر سانى 200 دەن 2000 عا دەيىن كوبەيدى»، - دەدى ۆيتسە-مينيستر ورتالىق كوممۋنيكاتسيالار قىزمەتىندە وتكەن بريفينگتە.

ونىڭ ايتۋىنشا، بۇل قىزمەتكە ازاماتتارعا ارنالعان ۇكىمەت كورپوراتسياسىنىڭ فرونت-كەڭسەلەرىندە كونسۋلتاتسيا بەرگەن ماماندار تارتىلعان.

«بايلانىس ورتالىعىنا حابارلاسا الماعان ازاماتتاردىڭ شاعىمىن دا ەستىدىك. جاي كۇندەرى 1414 نومىرىنە ءبىر كۇندە تۇسكەن ەڭ كوپ قوڭىراۋ 25-30 مىڭ ارالىعىندا بولسا، قازىرگى ۋاقىتتا 600 مىڭ قوڭىراۋعا دەيىن تىركەلدى. جىل باسىنان بەرى بۇل ورتالىق 4 ميلليون ادامعا كەڭەس بەرگەن»، - دەدى ا. وسپانوۆ.

قازىرگى ۋاقىتتا بارلىق مەملەكەتتىك قىزمەتتەردىڭ 80 پايىزىن ەلەكتروندى تۇردە الۋعا بولادى. جىل سوڭىنا دەيىن ەلەكتروندى قىزمەتتەر ۇلەسىن 90 پايىزعا جەتكىزۋ جوسپارلانعان.

«وتكەن جىلى ەلەكتروندى ۇكىمەت پورتالىندا 47 ميلليون استام قىزمەت ەلەكتروندى تۇردە كورسەتىلدى. بۇل كورسەتكىش 2018 -جىلمەن سالىستىرعاندا، 57 پايىزعا ارتىق. حالىققا قىزمەت ورسەتۋ ورتالىقتارى مەن ازاماتتارعا ارنالعان ۇكىمەت كورپوراتسياسىندا بىلتىر 27 ميلليون قىزمەت كورسەتىلدى. بۇل 2018 -جىلعى قىزمەتتەن 4,5 ميلليونعا ازىراق. ياعني، مەملەكەتتىك قىزمەتتى ونلاين تۇردە الۋشىلار سانى ارتىپ كەلەدى»، - دەدى ابىلايحان وسپانوۆ.

اۆتور: ايجان سەرىكجان قىزى