الەمنىڭ 140 ەلىن جاياۋ ارالاعان ليۆيالىق نۋري فۋناس اقتاۋعا جەتتى

None
None
اقتاۋ. قازاقپارات - الەمگە ەسىمى بەلگىلى ليۆيالىق ساياحاتشى اقتاۋعا جاياۋ جەتتى، دەپ حابارلايدى قازاقپارات ءتىلشىسى.

بۇگىندە ونىڭ ءتولقۇجاتىندا ءمور قوياتىن ورىن جوق. سەبەبى، الەمنىڭ 140-تان اسا ەلىندە بولعان. نۋريدىڭ قازاقستانعا ساياحاتى وسى جىلدىڭ اقپان ايىندا باستالدى. وسى ۋاقىتقا دەيىن ول ەلىمىزدىڭ سولتۇستىگى مەن وڭتۇستىگىن ارالاپ ۇلگەرگەن. جالپى، العاشقى ساياحاتىن 1998 -جىلى باستادى. ونداعى ماقساتى - ليۆيادان بۇكىل الەمگە جانە الەمنەن ليۆياعا بەيبىتشىلىك، تاتۋلىق پەن مەيىرىمدىلىك جولداۋىن جەتكىزۋ.

الەمدى جاياۋ شارلاعان نۋري كوكتەمدە رەسەيگە جەتۋدى جوسپارلاعان. الايدا، جەر جاھاندى جايلاعان پاندەميانىڭ سالدارىنان بارلىق جوسپارى كەيىنگە قالدى. جيھانكەز قازاقستانعا كەلۋدى شەشكەن. ءسويتىپ، ءۇش مىڭداعان شاقىرىمدى ارتقا تاستاپ، كاسپي جاعاسىنا كەلىپ جەتتى.

«كاسپي تەڭىزى تۋرالى كوپ ەستىدىم. وسى ادەمىلىكتى ءوز كوزىممەن كورگىم كەلىپ، قۇلشىنىس پايدا بولدى. ەرەكشە اتاپ وتكىم كەلەتىنى مەنىڭ جولىمدا ىزگى نيەتتى ادامدار كوپ كەزدەستى. سونىمەن قاتار ەڭ كەرەمەت دەگەن جەرلەردى كورۋىمە كومەكتەستى. ادامدار: «سىزگە ازىق- تۇلىك، تاعامدار كەرەك پە؟ اقشادان قينالىپ جۇرگەن جوقسىز با؟ باسپانا كەرەك پە؟»، - دەپ سۇرايدى. مەن ءتىپتى ازداپ سالماق قوستىم. سەبەبى ءار ەلدىڭ وزىندىك تاعامدارىن جەيمىن. ەندىگى كەزەكتە بالىق جەيتىن بولامىن»، - دەدى جاياۋ ساياحاتتاۋشى نۋري فۋناس.

جيھانكەز مۇنداي ۇزاق جول تۋرالى ءبىر مينۋتقا وكىنبەيدى. وعان ىستىق تا، قاتال كليمات تا كەدەرگى ەمەس. وسى جىلدار ىشىندە نۋري كەز كەلگەن قاۋىپتى جەڭۋگە ۇيرەنگەن. ول ساياحاتتاۋ كەزىندە قيىنشىلىقتار بولعانىن دا اتاپ ءوتتى.

«جابايى جانۋارلار، قاسقىرلار كەزدەستى. الايدا، مەن بارىنە ۇيرەنگەنمىن. وسىنداي وقيعالار كەزىكسە ءوزىمدى قالاي ۇستاۋدى بىلەمىن. ادامداردىڭ بەيبىتشىلىك پەن كەلىسىمگە دەگەن سەنىمىن ۇيالاتۋدى ماقسات ەتىپ قويعان بولاتىنمىن. مەن ادامداردى دىنىنە، ناسىلىنە قاراپ بولمەيمىن. ادامزاتتىڭ ءبارىن جاقسى كورەمىن»، - دەدى ول.

نۋري فۋناس مىڭداعان شاقىرىمدى ءجۇرىپ ءوتىپ، ءوزىنىڭ ەرەكشە ميسسياسىن ورىنداۋمەن كەلەدى. ول بەيبىتشىلىكتى، ادامعا دەگەن ماحابباتىن، جاقىنىنا دەگەن سۇيىسپەنشىلىك پەن مەيىرىمدىلىك قاتىناستاردى ورناتۋدى ماقسات تۇتادى.

قازاقستان - نۋري فۋناستىڭ ازياداعى سوڭعى نۇكتەسى. كەيىنىرەك ول نۇر- سۇلتان قالاسىنا ۆيزاسىن ۇزارتۋ ماقساتىمەن بارۋدى كوزدەپ وتىر. ودان كەيىن رەسەي، ۋكرايناعا جول تارتپاق. ال بۇكىل الەم بويىنشا ساياحاتى اياقتالعان سوڭ، نۋري فۋناس ليۆياعا ورالىپ، وتاعاسى بولۋدى ارمانداپ وتىر.

فوتو: 24.kz

اۆتور: قاراكوز مارات


سوڭعى جاڭالىقتار